Shillong, Nohprah 03 : Ka Sorkar Meghalaya kala pynsdang ia ka survey halor ka jingdon ki nongdih droks ha baroh kawei ka Jylla, kaba thmu ban lum jingtip ban pyntip ïa ki jingïarap kiba pynshong nongrim ha ki sakhi na ka bynta ban ïada, ai jingsumar ia ki nongdih, ai jingiarap ba kin lait noh na ka jingkyrni, bad ka jingkyrshan ka imlang sahlang.
Ia kane ka survey, ka ban leh da ka Sankardev College, Shillong, ha ka jingiatreilang bad ki Seng jong ki nongdih droks, kan sdang da ka jingpyrshang shuwa ha sor Shillong bad hadien kan sa iaid sha baroh ki District ka Jylla.
“Ka jingialang mynta ka sngi ka dei ka dak ka jingiasoi ia ka soskular hapdeng ka DREAM Mission bad ka Sankardev College, Shillong, ka jingiatreilang ka ban pynkhlain ia ki sienjam ba dei ban leh kat kum ka jingstad saian bad ka jingwad bniah halor ka jingktah jong u drok ha ka Jylla,” ong u Director ka DREAM Bah Francis Kharshiing ha ka sngi thohdieng.
Ula ban jur ia ka jingkongsan ka surver bad ong “Ki jingshem kin pynlah ia ka Sorkar ban thaw ia ki lad jingiarap kiba thikna, kiba pynshong nongrim ha ki sakhi ban ai jingiada, ai jingsumar ia ki nongdih, iarap ba kin lait noh na u kynjri bad ka jingkyrshan ka imlang sahlang”.
Ka survey ka dei ka sienjam ba kongsan ha ka mishon jong ka Sorkar ban iakhun pyrshah ia une u jingdih buaid bad ban iada ia ka lawei jong ki samla ka Jylla.
Ka jingiashimbynta lang ki seng jong ki nongdih droks kynthup ia ka MUF bad MeduNet, ka pyni ia ka jingkut jingmut jong ka Sorkar sngewthuh lem, ban burom bad kynthup lang.
U Myntri Rangbah ka Jylla Conrad K Sangma u la pynskhem ia ka jingkut jingmut jong ka sorkar, haba ban jur ba ka jingiakhun pyrshah ia u drok ka dei ka jingkitkhlieh lang jong ka sorkar, ki jaka treikam, ki shnong ki thaw, bad ka imlang sahlang baroh kawei.
“Ka sorkar ka la kut jingmut shisha ban : ïada ïa ki samla na ka jingma jong u drok, ka jingai jingkyrshan bad ki lynti jong ka jingkoit jingkhiah na ka bynta kito kiba shah ktah bad ban ai bor ïa ka imlang sahlang ban ïashimbynta lang ha ka lynti ban lah iakhun ,” ong u CM.
