Nongstoiñ, Nailur 18: Ka KSU Mawshynrut ha ryngkat ka jingsynran lang u MLA/MDC Bah Gigur Marthong, ka la dawa ïa u Myntri Rangbah ka Jylla Conrad K Sangma Myntri ban pynïar bad pynbun ïa ki Tnad treikam bapher bapher ha Mawshynrut Civil Sub division.
Ki Nongialam ka Seng ba kynthup ia u President Samla Armstrong Sohshang bad General Secretary Samla Ulysis Ryntong lem bad ki nongïalam ka Sengkmie, kila iakynduh markhmat ia u Myntri Rangbah bad aiti ruh ia ka dokhas halor kane ka kam.
Kine ki Nongialam ka KSU ki pyntip ba ha ka jingiakren bad u Myntri Rangbah, la pynpaw ba ka Mawshynrut Sub Division ka pat lah satia ban treikam pura ne ai ka jingshakri kaba hun ia ki paidbah namar ka jingduna jong ki Tnad Treikam.
“Ngi lyngngoh ba haduh mynta, ka Sub Division kam pat don satia iala ka jong ka Ophis hynrei kala shu shongwai ha Iing ki briew” kila pynpaw.
Ki pyntip ba haduh mynta, ki paidbah ha thain ki dang hap ban kiew sha Nongstoin ha kiba bun ki kam Ophis namar ka jingduna ki shnat treikam ha Sub Division.
Ki mat ba ka seng ka la pynsngew sha u Myntri Rangbah ki long ka jingdonkam ban don noh ka Development Branch, Election Branch, Supply Branch, Public Health Engineering (PHE) Department, Office jong u Sub-division of School DSEO, Labour Department, Metrological Department, VIP Gallery ha Riangdo bad kiwei kiwei.
Ka jingïakynduh bad u myntri rangbah ka jylla kam shym la pynhun ïa ka seng, namar na ki 8 tylli ki mat jingdawa u la kular ban pyntrei kam shwa tang ar tylli haba pyntip ba u Myntri Rangbah ula kular ban sa wanrah noh ia ka Election Branch bad ka Supply Branch.
