Guwahati, Naiwieng 13: Ki Pulit jong ka jylla Assam kila ioh ban kem haduh 15 ngut ki briew ki donkti ban kynthoh pynshit bad aiding ha ki rynsan Social Media na kylleng ki District halor ka jingshah kynnoh ba kila post ia ki jingkynthoh kiba ym lah ban pdiang ha kaba iadei bad ka jingjia shah pynbthei bom ha Delhi.
Na ka liang ki Pulit kila ong, Khyndai ngut ki briew kila shah kem ha ka sngi Palei kiba dei na Bongaigaon, Hailakandi, Lakhimpur, Barpeta, Hojai, Kamrup bad na South Salmara districts. Ia kine ki briew la tip kyrteng kum u Rafijul Ali (Bongaigaon), Forid Uddin Laskar (Hailakandi), Inamul Islam (Lakhimpur), Firuj Ahmed ba ju khot sin Papon (Lakhimpur), Shahil Shoman Sikdar ba ju khot sin Shahidul Islam (Barpeta), Rakibul Sultan (Barpeta), Nasim Akram (Hojai), Taslim Ahmed (Kamrup) bad u Abdur Rohim Mollah ba ju khot sin kum u Bappy Hussain (South Salmara).
Ha ka sngi Balang, ki Pulit kila kem biang sa san ngut bad kine ki kynthup ia u Mattiur Rahman (Darrang), Hassan Ali Mondal (Goalpara), Abdul Latif (Chirang), Wajhul Kamal (Kamrup) bad u Nur Amin Ahmed (Bongaigaon)—kiba la share ia ka jingkynthoh kiba long kumba ai ding shuh shuh ha kaba iadei bad ka jingshah pynbthei bom.
Haba ïakren sha ki lad pathai khubor, u Myntri Rangbah ka Jylla Assam u Himanta Biswa Sarma u la ïathuh ba baroh ki la don haduh 15 ngut kiba la shah kem haduh mynta ka sngi halor ka jingpynphriang ïa ki jingthoh kiba long pynshit bad kiba pyniapher ia ka jingsngew jaitbynriew ne ka “provocative and communal” ha ki synsan social media lyngba ki online post.
U Sarma u la pynpaw ba ka sorkar jylla kan ym ai lad ban pynthut ia ka shongsuk shongsain bad ka jingiatylli ha ka imlang sahlang, bad u la bthah ia ki pulit ban bteng ia ki kam kiba tyngeh pyrshah ia kum kine ki kam.
Ha ka jingthoh ha ka X, u Sarma u la thoh, “Ki Pulit ka Assam kin ïai bteng ban leh tyngeh pyrshah ïa kino kino kiba pyndonkam bakla ïa ki social media da kaba pynsaphriang ïa ka jingshun ne ban iaroh ne ai burom ïa ki kam pyntieng ki lehnoh.”
Kham ha shwa, uwei u Principal jong ka sul sorkar uba la shongthait u la shah kem na Cachar district halor ka jingkynnoh ba u la kren ha kaba iadei bad ka sain pyrthei kaba pyniadei bad katei ka jingjia. La pyllait noh ia u nadien ba kila ioh pdiang ia ka notice.
Ki tyllong khubor na ki pulit ki la iathuh ba kane ka jingkem ka long hadien ka jingpeitngor kaba janai bha ia ki rynsan social media, da ka jingthmu ban tehlakam ia ka jingthmu ban pynthut ia ka shongsuk shongsain bad ruh ban khanglad ia ki briew kiba iaroh ia ki kam pyntriem jong ki lehnoh. Ki pulit ki la ai ruh ka jingkular jong ki ban leh kloi ia kino kino kiba pyrshang bad thmu ban pynmih ia ka jingkulmar ne ban pynthut ia ka shongsuk shongsain.
