Shillong, Naiwieng 13: Ki nongshong shnong ka shnong Nohwet, East Khasi Hills, kaba hap hapoh Pynursla Police Station ha ka sngi Balang, kila lap iaka metiap jong uwei u briew ba 49 snem eiei.
Ia une u briew la tip kyrteng da u Tapan Dey uba sah ha Bishnu path jong ka thaiñ Ganeshnagar, Kamrup Metro, Assam.
La iathuh ba ia katei ka metiap la iohi da ki katto katne ki kynthei jong katei ka shnong kiba la leit ban lum dieng na khlaw.
“Baroh ki jingdon jingem jong u la lap hapoh kawei ka kali pickup Mahendra. Ia ka met iap la lap ba ka thiah ha madan bad u tyllai ha ryndang bala teh ha ka tnat jong u dieng” la ong kiba iohi.
La iathuh ba u Tapan Dey u la wan sha kane ka shnong ban pynpoi ia ka Generator sha kawei ka kynhun ba shna ia ka Tower bad la suba ba u la pyniap ialade.
“Ngin sa lah ban pynthikna ia ka rukom iap hadien ba la dep leh ia ka post-mortem. Ia ka metiap la phah sha Civil Hospital ha Shillong ban leh ia ka donkam” la ong u heh pulit.
