Shillong, Naiwieng 13 : U National President ka NPP bad Myntri Rangbah ka Jylla Conrad K Sangma ha ka sngi Palei ula pynpaw ba ka jingthaw ia ka Regional Front kan ym ktah satia ia ka jingiatreilang jong ka Party (NPP) bad ka National Democratic Alliance (NDA) ba ialam da ka BJP ha ka Sorkar Pdeng.
“Em, ngi ju iatreilang beit bad ka NDA, ngi la kren shai ia kane. Wat mynta ruh nga don ia u Myntri BJP, ka TIPRA Motha ka dei shibynta jong ka Sorkar, kumta kala shai bha halor kane ka bynta” ula ong haba iakren bad ki nongthoh khubor.
Ha ka 4 tarik Naiwieng, u Conrad ha ryngkat u nongseng ka TIPRA Motha Pradyot Bikram Manikya Debbarma, u Nongialam barim ka BJP bad Myntri barim ka Nagaland Mmhonlumo Kikon, u nongseng ka People’s Party ha Assam Daniel Langthasa, kila pynbna ia ka rai ban thaw noh ia kawei ka seng iatylli lang jong ki sain pyrthei ka ban mihkhmat na ka bynta ka jingangnud ki paidbah ka thain Shatei Lam Mihngi.
U Conrad ula batai ba ka jingmih jong kane ka kynhun riewlum ka thmu eh ban pynioh ia ka rynsan kaba khlain ha kaban lah kren ia ki kam kiba ktah lang ia ka thain.
“Kaei kaba ngi ong ka long ban gin iawanlang ban pynthikna ban gin don ia ka rynsan kaba khlain ka ban pynlah ia ngi ban kren ia ki jingeh ka thain. Kane kam dei ka jingiakhun pyrshah ia ki shimet hynrei ka dei tang ka jingsngewtuh ba ngi hap ban iawanlang ban wanrah ia ka jingiatylli khnang ba ngin khlain kum ka kynhun bad kum ki nongialam ka thain, ka ban pynlah ia ngi ban kren ia kiwei pat ki nongialam da kaba sur kaba khlain ha ki sngi ban sa wan” ula ong.
Haba jubab iaka jingpynsngew ba kane ka kynhun thymmai ka khlem iasyllok lang ia baroh ki seng riewlum-kum ki seng riewlum na Meghalaya, Mizoram bad Arunachal, u Conrad ula pynpaw ba kiei kiei baroh kiba jia ki dei ki kam kiba dang iaid.
“Ka dei ka kam ba dang iaid. Kam pat dei ba ngi lah rai ba baroh kin shu wan tang haba nion ia uwei u budam bad baroh kin sa iasoh lut, kam long kumta. Kane kam pat ju jia mynno mynno ruh. Ngi la sdang ia ka kam ha kaba katto katne ngut na ngi, ngi la rai ban iawanlang bad ka jingiasyllok kala jia hapdeng kine ki kynhun. Kin sa rai kumno ban jam shakhmat bad hadien kin sa sdang iasyllok bad kiwei pat ki seng sain pyrthei kiba kwah iatreilang bad kiba kwah ban wan shakhmat”.
 bad ka National Democratic Alliance (NDA) ba ialam da ka BJP ha ka Sorkar Pdeng.){kind=link}