Shillong, Naiwieng 9: U Lat ka jylla u CH Vijayashankar ula ban jur ba ka jingpynneh pynsah ia ka mariang ka dei shi bynta jong ka kolshor ki jaidbynriew riewlum ka Meghalaya, khamtam hapdeng ki paid Khasi kiba im ryngkat ka jingiadei kaba iajan bad ki khlaw, jaka bad ki jingdon jingem tynrai da kaba shim ba kidei ki jingai sngewbha jong u nongbuh nongthaw.
U Lat ula iawer ban donlang ia ka jingkitkhlieh ha ka ban bteng ban iada ia ki jait jingim bapher bapher, ki khlaw bad ki mrad na ka bynta ki pateng ban wan.
U Lat ula kren ia kane ha ka jingialang pynieng ia ki mawbynna ha u Lum Sohpetbneng, kum shi bynta jong ka jingrakhe iaka Quasquicentennial ne 125 snem jongka Seng Khasi.
Palat 41 tylli ki mawbynna lah dep ban pynieng ha utei u lum ba kyntang da ki shnad bapher ka Seng Khasi kum ka jingkynmaw ia ka histori ba kyrpang jongka Seng Khasi kaba la seng ha ka 23 tarik u Naiwieng 1899 ha Shillong hapoh ka jingbtin lynti jongu Babu Jeebon Roy.
La 125 snem ka Seng Khasi kala pynneh bad kyntiew ia ka Niam Tynrai, ka lehniam lehrukom,ki kolshor bad ki riti dustur tynrai jong ki paid Hynñiewtrep.
U Lat ula iaroh ia ka Seng Khasi kum kawei na ka seng hapoh ri India kaba la rim bad kaba pynneh pynsah ia ka jinglong tynrai bad ula iaroh ia ka imlang sahlang ha kaban iada ia ka jingstad jingshemphang jong ki longshwa manshwa wat hapdeng ka jingiaid ka por bad ki jingkylla.
Ula pynpaw ba ki mawbynna kim dei tang ki maw hynrei ki dak ki shin jong ka jinglong kyntang kiba mihkhmat ia ka jingbteng, jingkhlain bad ka jingkynmaw kaba im jongki longshwa manshwa. Ula banjur ruh ia ka jingdonkam ban iaid ryngkat ia ka jingiaid shaphrang ka juk bad ka jinglong tynrai ka kolshor bad ka jingngeit kaba tipbriew.
Ula ai khublei iaka Seng Khasi ha kane ka jingkynjoh ia u mawmer bad pynpaw ba ka jingngeit skhem ba kane ka jingrakhe dap 125 snem kan iai pynkhlain ia ka jingsngewsarong iala ka kolshor, jingiatylli bad ka jingpynneh pynsah ia kaba rim bajah kaba iaid ryngkat bad ka jingiohi jngai ka ri ka Viksit Bharat kaba ngam jylliew bad ka kolshor bad ka jingiaid ka juk.
Ha kane ka prokram la iadonlang u Symbud Myntri Rangbah ka jylla u Bah Prestone Tynsong, u Myntri ka Pule Puthi u Bah Lahkmen Rymbui, u Myntri ka Tnad Arts & Culture u Bah Sanbor Shulla, ki nongialam ka Seng Khasi, ki nongialam na ki shnad na kylleng ka rilum Khasi – Jaintia Hills.
