Shillong, Naiwieng 09 : Ka kynhun ki thei ialehkai ka Jakrem bad ka Na Rympei Football Academy, ki la rung sha ka phainal jong ka lympung ialehkai Meghalaya Women’s State League 2025, ba la pyniaid da ka Meghalaya Football Association.
Haba phai sha ka jingiakhun, ka kynhun ialehkai jong ka Jakrem, ki la lah ban beh kylla nadien ban pynliem ia ka kynhun ki thei ialehkai ka Laitkor SC da 2-1, ha ka jingiakhun kaba la long ha madan ka SSA Stadium, Polo.
Ha kane ka jingiakhun, ka Laitkor SC ka kynhun kaba khlain bad kaba la paw bha ha baroh shi lynter jong kane ka lympung iakhun, ka la lah ba kan tam shawa shakhmat da 1 kaba la ioh ban thep ia ka da ka Inrila-i-dor Khongthaw (28′).
Marsien ia shah thep kane ka shi kol, ka kynhun ka Jakrem, ki la sei ka buit ka bor ialehkai ka jong ki, da kaba ka la lah shwa ban pyniakhaid ia kane ka shi kol ba ki la shah tam kaba la wan lyngba ka Sunalinda Iawren (55′), kaba khur ruh ia ka nam player of the match bad ha ka minit ban sa wai noh artad ka jingiakhun, ka Iaphisha Marbaniang (90′) jlang ka la ioh ba kan thep ia ka kol kaba ar, kaba pynlong ia ka Jakrem ba kan jam sha ka phainal.
Ha kawei pat ka jingiakhun ia ka semifinal ba la long ha madan ka SAI STC NEHU, ki kol lyngba ka Pynhun Shulet (15′, 48′) bad Tracy Rympei (50′, 88′) ka la biang pura ia ka kynhun ki thei ialehkai ka Na Rympei Football Academy ban pynliem ia ka Pay For Right Football Academy da 4-1, ha kaba ia kane ka shi kol jong ka PFR la thep ia ka da ka Nisilia Majaw ha ka minit kaba 73.
Ka phainal jong kane ka lympung ialehkai la buh ba kan long ha ka miet jong ka 12 tarikm mynta u bnai.
