Shillong, Risaw 10 : U Nongialam ka Liang Pyrshah Mukul Sangma ula pynpaw ia ka jingsngewkhia halor ka jinglong jing man ka suk ka sain ha Meghalaya, khamtam hadien ka jingshah pyniap ki arngut ki Khynnah.
Kat kum ka jingong jong u, ka long kaba donkam ia ka jingsngewthuh kaba bniah ia jingeh kiba don sawdong jong ki jing leh beain bad ki kam bymman hapoh ka Jylla.
Haba kren sha ki lad pathai khubor ha ka sngi Thohdieng, u Mukul ula ban jur ia ka jingkongsan ban pynduh jait ia ki kam bymman barit baria, ia kaba u ngeit ba ki lah ban nang ai mynsiem sha ki kam bymman kiba heh.
Ula kdew ia ki kam tuh kam thiem, ka jingtuh masi, bad kiwei ki kam bymman kila nang kiew ha ki jaka nongkyndong ha kaba bun sien ki donkti da ki kynhun runar.
U Mukul ula pynrem ia ka Sorkar ba kam shym la leh ha ka rukom kaba dei ban pynkhlain ia ka Tnad Pulit, haba kdew ia ka jingduna ki briew kum ka jingeh kaba khraw.
U pyntip ba ula iakren ia u Senior Superintendent of Police (SSP) uba la pynsngew ia ka jingeh ha ka jingduna briew, mkaba ktah ia ka jinglah jong ki Pulit ban ialeh pyrshah ia ki kam bymman.
Une u Myntri Rangbah barim ula buh jingkylli ruh ia ka jingkut jingmut jong ka Sorkar ban pyntreikam ia ka Meghalaya Resident Safety and Security Act, kaba la pynwandur ban pynkupbor ia ki shnong ki thaw ba kin iatreilang ha kaban khmih ia ki jingeh ba iadei bad ka jingshngain bad ki lad jingiada.
Ula kdew ba ki kyndon ka Ain, kum ka jingpyndait ia ki kor CCTV ha ki jaka ba kongsan, ka dei ka bym pat pyntreikam pura satia. Ula pynpaw ruh ia ka jingsngewkhia halor ka jinglait ki kam Pulit ha ki Police Station bad battalion, ia kaba u ngeit ba ka dei ka jingleh khnang ban pyndkoh ia ka tnad Pulit.
Ula buh jingkylli ia ka jingthmu jong ka Sorkar halor ka jingbym lah pyndap briew ha ki kam kiba lait, kaba pyni ba lehse ka lah ban dei ka lad pynduna ia ka jinglut jingsep lane ka jingbym don jingsngew halor ka jingshngain bad jingiaada ka Jylla.
