Shillong, Risaw 11: Ka VPP ba ialam ia ka Executive Committee ha KHADC, kala aipor hynniew sngi ia ka Superintendent of Professional Tax Kong P Mylliemngap ba kan pynshai da ka jingthoh halor ka jingkynnoh ai notice sha ki dukan sha, marbam ha Mawlai ba kin siew ia ka professional tax.
La kynnoh ruh ba ka Superintendent ka Professional Tax kala ai ia kine ki notice khlem ka jingmynjur jong ka Executive Committee.
Ia kane ka show cause notice la pynmih da u Secretary ka EC ka KHADC ha ka sngi Thohdieng, kaba ong ba bun ki nongkhaii trai shnong kila ioh pdiang ia ka notice ha ka 29 bad 30 tarik Nailur ha ka por ba ym pat thaw satia ia ka Executive Committee namar ka jingiehnoh kam u Chief Executive Member.
“Ia kine ki notice la ai khlem ka jingbit na ki bor ba dei khmih…..kumta, la bthah ia phi ban ai ia ka jingbatai da ka jingthoh sha uba soi kyrteng harum hapoh 7sngi n aka sngi ba ioh pdiang ia ka notice, kaba batai shai balei ba ym hap ban leh eiei pyrshah ia phi kat kum ki rule ba treikam” kala ong.
Kumban shu kdew hangne, hadien ka jingmih ka jingkren u CEM ha ki lad pathai khubor ba pynshai ia ka jing sam ia kine ki notice, ki rynsan social media kila shlei ruh da ki notice ka tnad Professional Tax ka KHADC kiba la sam sha ki dukan ha Iewduh naduh u bnai Iaiong, 2025.
Kane ka pyni shai kdar ba ka jingphah siew ia ka khajna professional tax ia ki dukan sha, marbam, bad ki dukan barit baria kala sdang naduh u bnai Iaiong 2025.
