Nongpoh Risaw 11: Ki pulit jong ka Ri Bhoi tang hapoh jong ka 24 kynta kila iohkem ia u Iainehskhem Kharsati uba la donkti ha kaban leh be-ijot bad pyniap ia ka khynnah kaba 13 snem ka rta kaba la jia ha kawei ka shnong ha Ri Bhoi District.
Katkum ki khubor bala iohlum na ki pulit la iathuh ba u Iainehskhem Kharsati uba la don 22 snem ka rta udei u khun jong ka (L) Rinosha Kharsati kiba na Ri- Bhoi District bad ha ka jingtohkit ula phla ha ki pulit ba ula leh be-ijot bad pyniap ia ka Khynnah kaba dang 13 snem.
Ki pulit jong ka Ri Bhoi District kila pynlong mardor ia ka jingtohkit ban thwet ia uwei u samla uba la suba jur ba ula leh ia kane ka kam bymman uba la jah rngai ha ka sngi Palei.
Kane ka khynnah kala jah naduh ka por 11 baje mynstep jong ka sngi Palei hadien ba wan phai na skul bad kumta ki bahaiing bahasem jong kane ka khynnah kila leit wad naduh ka por janmiet bad ia ka metiap la lap ha ka por 7:20 baje janmiet.
Hadien ba la pyndep ia ka post mortem ha ka step sngi Thohdieng bad na ki dak ki shin, kala paw ba kane ka khynnah kala shah leh be-ijot bad hadien kane kala shah pyniap noh ha u runar.
