Shillong, Risaw 10: U Symbud Myntri Rangbah ba khmih ia ka Tnad Urban Affairs Bah Sniawbhalang Dhar, ha ka sngi Thohdieng ula pyntip ba ka Sorkar kala ithuh ia ki katto katne ki jaka na ka bynta ka jingtyrwa ban pynkynriah ia ki 342 tylli ki longiing na Them Metor ha Them Iew Mawlong.
Haba kren sha ki lad pathai khubor, u bah Sniawbha ula ong ba ki jingiakren ki dang iaid hashuwa ban shim rai ia ka jaka ba thymmai.
“Ngi dang don ha ka kam bad phin sa tip ynda ngi la rai” ula ong.
Haba iadei bad ka jingiakren ba dang iaid bad ka Defence Ministry, u bah Sniawbha ula ong ba kane ka kam ka dang don ha ka jingiakren. “Ngi dang iakren bad ki” ula ong.
Haba pynpaw ba ka mukotduma ka dang sahkut ha Iingkashari, u Symbud Myntri Rangbah ula ong “Hooid, ka mukotduma ka dang don ha Iingkashari, bad ngi la leh iala ka kamram kum ka Sorkar Jylla (ban pynkloi ia ka jingpynkynriah)”.
U Bah Sniawbha ula pynpaw ia ka jingkyrmen ba ia kane ka kam yn sa iapynbeit da ka jingiasngewthuh jingmut lang wat hapdeng ka jingbishar ka Iingkashari. “Ngi kwah ban shim rai lang da ka jingiasngewthuh jingmut, watla kane ka kam ka dang sahteng ha Iingkashari. Kyrmen skhem, ngi dei ban lah ban pynbeit ia ka. Lehse kan shim katto katne por, hynrei ngi khlem shong kli kti, ngi la trei ia ka kam bad ngi la shimkhia bha ia kane ka kam” ula kular.
