Shillong, Risaw 10: U Symbud Myntri rangbah bad Nongialam ka NPP Bah Sniawbhalang Dhar ha ka sngi Thohdieng, ula ban jur ba kam don satia kano kano ka jingiapher jingmut hapoh ka iing ka sem jong ka NPP.
Haba jubab ia ka jingkylli halor ka jingiapher jingmut hapoh Iing, u Bah Dhar ula kdew ba ka jingskhem jong ka Sorkar ha kine ki hynniew snem shiteng, ka dei ka sakhi ia ka jingiatylli ka party.
“Ha ka Iingka sem ka NPP, kam don satia kano kano ka jingiapher jingmut. Phi la sakhi ha kine ki hynniew snem shiteng. Ngi la iatreilang kum ka kynhun bad baroh 33 ngut ki MLA” ula ong haba iakren bad ki nongthoh khubor.
U Bah Sniawbha ula nujor ia ka jingskhem jong ka Sorkar NPP bad ka Sorkar Congress, kaba mad ia ka jingiaknieh long nongialam man ka hynriew bnai.
“Lada phi kynmaw ha ka por ka Sorkar Congress, man ka hynriew bnai kan mih ka jingiaknieh long nongialam. Hynrei ha ka NPP, kam ju don satia kaba kum kata. Phi tip bha ba kane ka dei ka Sorkar kaba skhem tam naduh ba ioh iala ka jong ka Jylla” ula bynrap.
