Shillong, Risaw 07: Ka rukom ialehkai jong ka Nangkiew Irat SC ka la lip rong ha ka jingiakhun ha ka sngi Ba-ar, kaba la shah pynbam haduh 5-0 kol hakhmat ka kynhun ialehkai ka Langsning FC, ha ka lympung Shillong Premier League 2025 ha madan Polo.
Ia kine ki kol ka Langsning FC la thep da u Wanshwadame Diengdoh (40’, 52’), Manbhalang Nongmin (84’) bad Donlad Diengdoh (90’, 90’+1). Kane ka jingshah rem ka long kumba theh um pjah hi slam ia ka kynhun ialehkai ka Nangkiew Irat SC ba kan lah ba kan rah ia ka nam kum ka lahduh jong kane ka lympung mynta ka samoi.
Da kane ka jingjop, ka kynhun ialehkai ka Langsning FC ka la ioh ba kan khur 14 point da kaba khynniat ia ka kynhun ka Nangkiew Irat sha ka kyrdan kaba saw hadien ba ka la lah ba kan ioh khur 13 point.
Ha ka jingshisha, kaei kaba ka Nangkiew Irat ka donkam bha na kane ka janmiet jong kane ka jingiakhun ka long ia ka nam jop, kaban plie lad ia ka ba kan lam kham hakhmat ia ka kynhun ialehkai jong ka Shillong Lajong bad kumjuh ia ka Mawlai SC.
Phewse kylla khongpong lut namar ba kum ka kynhun, ka syrwet ka nam ialehkai kaba kham bha ka shu wan ba kan mih paw tang ha ka por ba la iakhun ia ka kylla step, hynrei haba wan ban bteng ia ka kylla miet, ka shu jem la ka jem hi toin ki khnap ki jong ka ha ka sur ba dka rukom ialehkai kaba trait trait bad dar dar bha na ka kynhun jong ka Langsning FC.
Ka daw bah ka jinghiar syndet katta ka buit ka bor ialehkai ka Nangkiew Irat lehse ka lah ba kan dei hadien ba u referee ba la pyniaid ia kane ka jingiakhun u Pynskhemhame Mawthoh, u la pyndonkam ia ka bor bad ka iktiar ka jong u ban sei mar mar ia ki yellowcard, kaba long haduh san tylli tang haduh kaba kut jong ka kylla step, kum shi bynta ban tem ia ka jingsdang ban ialehkai khluit jong ki player ha madan.
Ki khep ne ki kabu ksiar kiba wan paw shynna ia ka Nangkiew Irat ha kane ka kynti iakhun ki wan ha ka kylla step lyngba u Khangmiki Pale bad Himanshu Patil, kaba pynlong ia u rangap kol ka Lasngning FC u Rajat Paul Lyngdoh ba un hap ban kham phikir bad peitngor bha ia kum kine ki jingma.
Hynrei kaba kham pysniew dur bha ia katta ka rong ka rup ialehkai ka kynhun ka Nangkiew ka dei ruh na u rangap kol u jong ka u Surjay Kumar pariyar, uba ha kane ka janmiet lah ban ong ba u khlem shoh ler bha katta ka rukom ap kol ka jong u, kaba pynlong ia ki bor ba dei khmih ka Nangkiew ba kim banse wat ban sei syndon noh ia u shabar bad ban pynmih bujli noh pat Akash Thapa, kaba jia hadien ba ka Nangkiew ka la dep ba kan shah tam lypa da lai kol.
Hynrei katba kane ka jingiakhun ka bteng ba kan jam sha kaba kut, katta ruh ka mynsiem iakhun ki player ka Nangkiew Irat I kumba ki la pyndem syndon ialade , kaba kylla long ka sien kaba nyngkong na ki hynniew sien iakhun ba ka la dep ba kan wanphai napdeng ka madan iakhun khlem da lah wat tang ban ioh ban thep wat shi kol ruh.
