Shillong, Risaw 07: Ka kynhun ki thei ialehkai ka Laitkor SC bad Jakrem SC, ki la lah ba kin ioh ban khiet ia ki nam jop kiba heh ki jong ki ha ka lympung ialehkai jong ka Meghalaya Women’s State League 2025, kiba la long hynnin ka sngi.
Na ka liang ka kynhun ialehkai ka Laitkor SC ki la lah ban pynliem da 6-0 pyrshah ia ka Attacker’s Youth Club ha ka jingiakhun ka Gr-A, katba ka Jakren SC ki la pynliem ia ka Mawten SC da 5-0, ha ka jingiakhun kaba dei ha ka Gr-B, katba sa kawei pat ka jingiakhun ka Gr-B, ki thei ialehkai jong ka Young SSCC bad ka Bright Future SSCC ka la kut noh ha ka jingiakhaid bym shim la don satia ba pynkhih ia ka jar.
Ha ka jingiakhun ba la long ha SSA Stadium, Polo, ki kol lyngba ka Iaraplang Nongrum (67′, 75′, 86′) ia kaba la bynrap lang sa ki kol lyngba ka Inrila-i-dor Khongthaw (12’) bad Sukrilin L Marshillong (22’, 25’), ka la biang pura ia ka kynhun ialehkai ka Laitkor SC ba kan pynsawa jam ia la ka jong ka sur ialehkai ba khlaiñ bad kaba tbit bha ka jong ka ha kane ka lympung mynta ka snem, kaba jia ryngkhat ba kane kan dei ka nam jop kaba arsien lynter ia kane ka kynhun.
Katba ki resol na ki jingiakhun kiba la long ha Mawlum Tyrsad, la sdang sha da ka jingiakhun hapdeng ki artylli ki kynhun kiba dei na ka synjuk ialehkai ka Pyndengumiong DSA katta ka Young SSCC bad Bright Future, kaba la kut ha ka jingiakhaid 0-0.
Katba ki kol lyngba ka Savinity Jyndiang (25′), Catherine Kharkongor (27′, 73′), Lavinia Lyngkhor (51′) bad Rosemary Wahlang (83′) ka la biang pura ia ki thei ialehkai ka Jakrem ba kin pynliem ia ka Mawten, kaba jia ryngkhat bad kine ki ar kynhun kidei na ka synjuk ialehkai jong ka Mawkyrwat DSA.
