Shillong, Nailur 08: Ka Mawlai kala pynrem ia ka Malki da 5-1 ha ka jingialehkai Shillong Premier League 2025 kaba la long hynne ka sngi Nyngkong ha SSA Stadium, First Ground, Polo.
Ka Mawlai kala ioh thep ia kitei ki 5 kol lyngba u Loving Suting ha ka 18 bad 30 minit, u Robert Khongriah ula thep kol ha ka 27 minit, u Fairming Suting ula thep ha ka 31 minit bad u Kevin Rymbai ula ioh thep ha ka 48 minit.
Katba u Damutlang Wahlang ula ioh thep ia ka shi kol na ka bynta ka Malki ha ka 45’+4 minit.
Kane ka jingjop kala pynlong ia ka Mawlai ban kamai 9 point bad ban bat biang ia ka kyrdan ka baar, katba ka Malki kala don ha ka kyrdan kaba 8 bad kamai 3 point na ki 4 sien ki jingiakhun.
Mar ia sdang ka kylla miet ka Mawlai kala ioh thep sa shi kol lyngba u Kevin, hynrei wat la katta ruh, ka Malki kala ioh ia ka kabu ban thep kol haba u nongialehkai ka Mawlai u Wallambok Dkhar ula pynur ia u nongialehkai ka Malki hapoh ka jaka jong u nongap kol, hynrei haba u Niklestone Ryntathiang ula leit ban shut ia ka penalty ym shim la lah satia ban thep kol namar ka bol kaba ula shut jam bha kala elit pynban sha ki jaka shong ki nongpeitkai.
Ha ka sngi Baar, ka jingiakhun kan long hapdeng ka Mylliem pyrshah ia ka Shillong Lajong kaba dang bat ia ka nam lahduh ha ka por 4:30 nohphai sngi kaban dei ruh ka jingiakhun kaba khatduh jong ka Round 4.
