Shillong, Naitung 08: U Myntri Sorkar bad MLA ka UDP na Khliehriat, u Bah Kyrmen Shylla ha ka sngi Nyngkong, ula pynthikna ba ka sorkar kala shimkhia ban pynthikna ba dei ban pyndep noh ia ka jingmaramot ia ka surokbah National Highway-6, wat hapdeng ka jingmad ia kiba bun ki jingeh.
Ula kubur ia ka jingslem ban shna ia ka surok ha ka district jongu khamtam ia ka surok Khliehriat-Ratacherra.
Haba iakren bad ki nongpathai khubor u Bah Kyrmen Shylla ula ong, ba katei ka jingslem kadei namar ba la pyndonkam da ka dewbilat ban shna ia ka surok, kaba donkam shibun bha ia ka por ban ia kaba shu siang rong.
Ula batai ruh, ba ia ka surok la shna da ka dewbilat, kaba dei kaba nyngkong ha katei ka thain, kaba la shim por bha namar ka jingdonkam ban rkhiang bha bad ban long kaba skhem.
Ula pynpaw ba ka jingeh kaba la mih kadei ruh namar ka jingshah ia ki kali ban iaid ha ka por ba dang shna ia ka surok bad kane kala pynkhim ia ka por jong ki kynta trei bad kala pynsuki ruh ia ka kam.
U Bah Kyrmen ula kyntu ia ki paidbah bad ia kiba pyndonkam ia ka surok, ba kin long kiba iai shah halor katei ka jingslem bad ula banjur ba shisien ba la dep ban shna ia kane ka surok kan ai jingmyntoi ia ki paidbah bad kan long ruh ka jingmyntoi kaban neh slem.
“Nga kyntu ia ki paidbah bad ia kiba pyndonkam ia ka surok ba kin sngewbha ban long kiba iai shah, namar kan sa shim por sa tang katto katne por hi ban shna pyndep noh ia katei ka surok, kin ym kynmaw ia kaei kaba la jia mynshwa namar ba kane ka surok kan ai jingmyntoi ia ki paidbah ki jong ngi. Kane ka surok kan ai ia ka hok jong ki paidbah” ula ong.
Ula pynthikna ba ka sorkar kan ialeh katba lah ban pynkloi noh ia ki kam ki jam bad ban shna pyndep noh kloi ia kane ka surok.
U Bah Kyrmen Shylla ula ong ruh, ba ka sorkar ka iengskhem ba dei ban shna pyndep ia kane ka projek shna surok, watla kala mad ia ki jingeh kiba bun bad ba ka jingmyntoi jong kane ka surok kan sa weng noh ia ki jingeh kiba la mad mynta shipor.
Ula kyntu ia ki paidbah ban long kiba shah shipor bad ban sngewthuh lem bad ula pynthikna ia ki, ba kane ka surok kan sa ai ia ka hok jongki paidbah bad kan kyntiew ruh ha ka rukom im ka jong ki.
