Shillong, Jylliew 25: Ka MDC ka NPP na Nongshken constituency Kong Grace Mary Kharpuri ha ka sngi Balang, ka la kyntu ia ka Khasi Hills Autonomous District Council (KHADC) ba kan wad ia ki lad ki lynti ban pynduh jait ia ki kam thombor pyrshah ia ki kynthei ha ka Jylla.
Ka Kong Grace kaba buh ia kane ka jingkyntu haba wanrah ïa ka Motion hapoh ka Dorbar lyiur jong ka KHADC haba kdew ïa ka jingjia kaba dang shen ha Nongrah, ha kaba kawei ka kynthei ka la shah pynïap ha la u kurim.
Ka Kong Grace ka la pynpaw ïa ka jingsngewsih ba watla ki don ki aiñ bapher bapher, hynrei ym pat don pat ki lad ban khanglad ïa kum kine ki kam runar pyrshah iaki kynthei.
“Ngi la don katto katne ki ain hynrei haduh mynta ngim pat lah ban leh ei ei bad haduh mynta ngim pat don ki lad kiba shu junom ban khanglad ïa kum kine ki kam thombor pyrshah ïa ki kynthei” ong ka Kong Grace.
“Kumta nga sngew ba ka la dei ka por ba ka KHADC ruh kan wad ki lad ki lynti kumno ban pynduhjait ïa ki kam thombor pyrshah ïa ki kynthei. Ka council ka lah ruh ban wanrah ïa ka Women Cell ban ai jingkyrshan ïa kiba ngat ha kum kine ki kam thombor” kala ong.
Haba pynksan ia ka jingdonkam jong ka jingpynsngewthuh paidbah, ka MDC na Nongskhen ka la ong ba ka donkam ia ka Council ban iatreilang bad ki nongdon bynta bapher bapher na ka bynta ban pynlong iaki prokram pynsngewthuh paidbah lyngba ki skul, ki dorbar shnong, ki Balang. Ka la ban jur ruh ia ka bynta kaba kongsan jong ki kmie ki kpa ha ka ban sneng ban kraw iala ki khun.
Haba pynpaw iaka jingsnngewthuh iaka jingsngewkhia ki dkhot ka iingdorbar thawain, ka Executive Member ba khmih iaka tnat Law & Legal Matters, ka Kong Deiti Majaw ka la ong ba ka Executive Committee kaba mynta hapoh ka por kaba lyngkot, ka la thaw ia ka Committee kumba la bthah da ka Sexual Harassment Act bad la thaw ia ka ICC ha ka 20 tarik u bnai Jymmang.
Ka Kong Deiti kala ong ba wat hapdeng ka jingpynbna ba la pynmih da ka tnad DCA halor kane, hynrei ym shym la leh ei ei da ka EC barim.
“Ka jingialang kaba nyngkong jong ka Committee kala long mynta u bnai (Jylliew)” ong ka Kong Deiti.
Haba pynpaw ba ka KHADC ka don tang khyndiat eh ka bor, ka EM ka la pynthikna pat ba ka EC kan sa shim ïa ki lad ki lynti ban pynduhjait ïa ki kam runar pyrshah ïa ki kynthei.
“Ka EC kan ïatreilang bad kiwei kiwei ki kynhun ban thaw ïa ki lad jingpynsngewthuh khnang ban pynshlur ïa ki kynthei ba kin wan shakhmat ban ïakhun na ka bynta ka hok jong ki. Ngin peit bniah ïa ki mat jong ka jingshah thombor ki kynthei ha ïing ha sem bad kiwei kiwei ki kam runar kiba ktah ïa ki kynthei jong ngi” kala ong.
 ba kan wad ia ki lad ki lynti ban pynduh jait ia ki kam thombor pyrshah ia ki kynthei ha ka Jylla.){kind=link}