Shillong, Jylliew 25 : U Nongaiktien ka Sorkar MDA bad Myntri Bah Paul Lyngdoh ha ka sngi Balang ula kular ba ka Sorkar kan buh hakhmat eh ia ka jingshngain bad jingiada ki briew bas ah ha khappud ka Jylla bad Assam hadien ba kyan ka jingiakynad na ka jingkynnoh wan thungdieng beain ki briew na Assam ha Lapangap,kaba hap hapoh u pud u sam ka West Jaintia Hills District.
“Ki Pulit ka Jylla kila shimkhia bad leit sha kane ka jaka. Ngi sa tuklar ia kane bad pynthikna ia ka jingshngain bad jingiada ia ki nongshongshnong ki jaka ba shah ktah. Ngan sa iakynduh ruh ia u Symbud Myntri Rangbah ba khmih ia ka kam Pohiing ban nang ioh jingtip shuh shuh halor kane ka jingjia” ong u Bah Paul haba iakren bad ki nongthoh khubor.
Ki paidbhur ba palat 400 ngut eiei na Lapangap bad ki shnong ba marjan lem bad ki Sengbhalang, kila leit pynpra ia ka jingtei bad jynrat ia ki symbai dieng ha Loom Pynthor, Lapangap, kum ka dak ka jingpyrshah ia ka jingwan thung dieng da ka Karbi Anglong Autonomous Council (KAAC) ia kaba ki ong ba ka dei ka jingpyrshang ban kyntur bein sha u pud ka Meghalaya.
U Bah Paul u iathuh ba u Symbud Myntri Rangbah ba khmih ia ka Tnad Transport Bah Sniawbhalang Dhar ula dep pynlong ia ka jingialang jong ka Regional Committee ka West Jaintia Hills dang ha kine ki ar taiew bala lah. Hynrei ula ong ba um don jingtip pat la kane ka jaka ba thungdieng ka hap hapoh ka jaka iakajia ne kumno.
“Naba u DyCM ba khmih ia ka Transport u dei u Chairman ka Regional Committee ka West Jaintia Hills, un dei u briew uba biang eh ban jubab ia ki jingkylli jong phi” ula bynrap.
Haba kylli la ka Meghalaya kan ujor pyrshah ia kane ka jingkyntur pud beain, u Bah Paul ula jubab da kaba ong “Hooid, lada phi kynmaw ia ka jingialang ba ngi long hapdeng ki Myntri Rangbah, ka dei kaba sngewtynnad bha bad kum ka jingbuddien ia kata, u Symbud Myntri Rangbah ba mihkhmat ia ka West Jaintia Hills ula leit ban iakynduh ia ki briew na Assam, u Chairman ka Regional Committee na Assam. Nga ai jingmut ba phin buddien ia kane ka kam bad u DyCM”.
Haba iadei bad ki jingpyrshang ban pynbeit noh ia ki jingiakajia pud, u Bah Paul ula ong “Haduh 5 tylli ki Shnong kila hap mynta ha ka thup kaba ngi ong ‘ki jaka bala dep pynbeit’ bad ka Sorkar kan sa pynbna ia kane ha ka Independence Day la 15 tarik Nailar. Kumta shuwa ba ngin poi sha ka 15 tarik Nailar, ngin pyrshang katba lah ban pynbeit noh ia kane ka sector ruh kumjuh”.
