“Kynnoh aiti u MLA da ki dulir sha ka Sorkar ban pynbeit ia u pud ha ka wat ba nyngkong”
Nongpoh, Nailur 03 : U MLA ka Jirang Konstituensi Bah Sosthenes Sohtun ula dawa ïa u Sordar ka Patharkhmah ba un pynshisha ia ka jingkynnoh ba u lum sopsop ia ki kot ki sla na ki Raid bad ki Hima ban aiti sha ka Sorkar Jylla ha ka jing ia pynbeit pud jong ka wat ba nyngkong hapdeng ka Sorkar Assam bad Meghalaya.
“Nga dawa ia u Sordar ba un pynshisha ia ki jingkynnoh pyrshah ia nga ba la lum sopsop ia ki kot ki sla na ki Raid bad Hima ban aiti sha ka Sorkar Jylla ha ka jingiapynbeit pud” ong une u MLA ka NPP haba iakren bad ki nongthoh khubor.
Une u MLA ula ong ba ka jingkynnoh jong u Sordar Bah Najim Kharmalki ha ka jingialang paidbah ba long ha ka 30 tarik Nailar ha Patharkhmah ka long ka bym don nongrim bad la shu kren tang ban kynthoh ia u nongmihkhmat ka thain.
Lah ban kdew, ba u Sordar ula pynmih ia kane ka jingkynnoh ha ka jingïalang paidbah bala pynlong da ka HYC, Ri Bhoi District ban pyrshah ïa ka MoU ba la ïa soi hapdeng ki ar jylla Assam bad Meghalaya.
Une u Sordar ula kynnoh hakhmat u paidbah ba u MLA ka Jirang Konstituensi u la lum sopsop ïa ki kot ki sla jong ki jaka puta na ki nongïalam Hima bad Raid ha ka thaiñ Jirang bad la aiti sha ka sorkar jylla na ka bynta ban pynbeit ne rai ïa u pud u sam ha ka jingpynbeit pud ka wat ba nyngkong.
“Nga kyndit ban tip halorkane ka jingkynnoh u Sordar ka Patharkhmah. Kane ka dei ka jingkynnoh tang ban pynthohbria ia nga kum u Nongmihkhmat bad ki Nongialam jong ki Raid bad ki Hima kin kubur ia kane” ula ong.
“U Bah Najim Kharmalki u dei ban pynshisha paidbah halor kine ki jingkynnoh ia nga bad ruh ban pynshisha ia kane hakhmat ki paidbah ka Jirang Constituency” ula bynrap.
