Shillong, Nailur 03: U National General Secretary ka BJP ba khmih ia ka Jylla Meghalaya u Dr M Chuba Ao hynne ka sngi saitjain ula pyntip ba ka BJP kala sdang iakren mynta ban weng noh ne em na ka jingiatreilang ha ka Sorkar Meghalaya Democratic Alliance (MDA) ba ialam da ka National Peoples Party (NPP) ha Meghalaya.
“Ka jingiakren kala iaid shakhmat, ngi lah lane ngin ym weng satia ialade na ka jingiatreilang bad ka NPP. Ngi sa iakren ia kane ka kam bad u President ka Party ban weng noh ne em”, pyntip u Ao haba iakren bad ki nongthoh khubor hadien ka jingialang.
Haba kylli halor ka jingiatreilang bad kiwei ki Party sha ka elekshon MLA-2023 ha Jylla, u Ao ula ong ba ka BJP kan ym kyrpad ne iakren ia kino kino ki party haba pynpaw ia ka jingsngewskhem ba ka Sorkar ban wan kan ym lah satia ban thaw khlem ka jingkyrshan jong ka BJP.
Haba kynthoh ia ka jingkren u President ka NPP Conrad K Sangma ba ka NPP kan iakhun marwei ha ka elekshon 2023, u Chuba Ao ula ong “Ngim lah ban pynbor ne kyrpad ia ki (NPP) hynrei khlem ka BJP, yn ym lah satia ban thaw ia ka Sorkar ban wan”.
Haba niew ia ka jingiatreilang ha ka elekshon kam dei satia ka jingiadei kaba neh shirta, u Ao ula ong “Hadien ka elekshon, baroh ki trei iala ki jong ki kam…kane ka dei kaba nga ong” haba ban jur ruh ba yn ym don satia ki sorkar ki ban lah thaw khlem ka jingkyrshan ka BJP.
