Shillong, Jymmang 10: Ka Ri India bad Pakistan hynne ka sngi Saitjain, kila shim ia ka rai ban sangeh noh ia ka jingiasiat ne jingther naming ban pynkut noh ia kane ka jingiakynad hapdeng ki ar tylli ki ri naduh ka por 5 baje janmiet.
Ia kane la pynbna da u Vikram Misri uba dei u India’s Foreign Secretary haba iakren bad ki nongthoh khubor.
Ula pyntip ba u Director General of Military Operations ka ri Pakistan ula iakren bad u Director General of Military Operations ka ri India ha ka por 3:35 mynsngi hynne ka sngi Saitjain bad pynpaw ba dei ban pynkut noh ia ka jingiakynad hapdeng kine ki ar tylli ki ri.
U Vikram Misri ula iathuh ba baroh ar tylli ki ri kila mynjur ban sangeh noh ia kano kano ka jingiasiat ne kino kino ki kam da ki bor shipai la ka dei ha khyndew, ha duriaw ne ha suinbneng naduh ka por 5 baje janmiet katkum ka por jong ka ri India.
Ki Director Generals of Military Operations kin iakren biang ha ka 12 tarik u Jymmang ha ka por 12 baje mynsngi.
Ka India bad Pakistan kila sdang ia ka jingiakynad mynta la saw sngi naduh ka 7 tarik u Jymmang, ha kaba ka India kala ther naphang ia ki ktem jong ki lehnoh kiba don hap ha ka Pakistan occupied Kashmir (PoK) bad ha Pakistan. Ka India kala ther ruh ia ki ktem shipai jong ka Pakistan, ha kaba kala pynjulor ruh ia ka Air Defence bad Radar System kiba don ha kylleng ki nongbah.
Ka Pakistan ruh kala ther naphang da ki kuli, namding bad ki drone ia ki jaka kiba don ha Jammu and Kashmir, Rajasthan bad Punjab, hynrei ia kine la lah ban tem noh da ki shipai jong ka ri India.
Ha kawei pat ka liang, hashwa ba ka ri India kan pynbna paidbah ia ka jingsangeh iasiat, u President ka ri America u Donald Trump ula thoh ha ka rynsan social media ka jongu, ba ka ri America kala lah ban wanrah ia ka jingiasuk hapdeng ka India bad Pakistan bad ka pynbna ba la pynsangeh mardor ia ka jingiasiat hapdeng kine ki ar tylli ki ri.
“Hadien ka jingiakren kaba jrong ha ka por mynmiet kaba la lamkhmat da ka United States, Nga dap da ka jingsngewbha ban pynbna ba ka India bad ka Pakistan kila mynjur ia ka jingsangeh iasiat kaba pura bad ban treikam noh mardor. Khublei ia baroh artylli ki ri halor ka jingpoi sha ka jingsngewthuh bad ia ka jingdon ia ka jingshemphang. Khublei shibun ia ka jingshah shkor ka jong phi halor kane ka kam” ula thoh ha ka rynsan X (mynshwa ka Twitter).
U U.S. Secretary of State, u Marco Rubio, ula ai shuh shuh ia ka jingpynshai ha kaba iadei bad kane ka jingiakren ban sangeh iasiat bad ula pyntip ba ma u bad u Vice President ka US u JD Vance kila iakren bad ki heh ophisar jong ka ri India bad Pakistan kynthup ia u Myntri Rangbahduh ka India u Narendra Modi bad ia u Shehbaz Sharif ha kine ki 48 kynta hashwa ban pynthikna ia ka jingsangeh iasiat hapdeng kine ki artylli ki ri.
“Ha kine ki 48 kynta, u VP Vance bad Nga ngi lah ia donbynta ha kaban iakren bad ki heh jong ka India bad Pakistan kynthup ia u Myntri Rangbahduh u Narendra Modi bad u Shehbaz Sharif jong ka Pakistan, u External Affairs Minister u Subrahmanyam Jaishankar, u Chief of Army Staff u Asim Munir bad National Security Advisors u Ajit Doval bad u Asim Malik. Nga sngewbha ban pynbna ba ka sorkar India bad Pakistan kila mynjur ban sangeh noh mardor ia ka jingiasiat bad ban sdang noh ia ka jingiakren halor ki mat kiba iar ha ka jaka kaba long pdeng. Ngi iaroh ia u Myntri Rangbahduh Modi bad u Sharif halor ka jingshemphang ka jongki, jingphikir bad jinglong nongialam ha kaban jied ia ka lynti jong ka jingsuk” ula thoh ha ka rynsan X (mynshwa ka Twitter).
