Shillong, Jymmang 10: Ka State Disaster Management Authority (SDMA) ka jylla ryngkat ka jingiatreilang bad ka India Meteorological Department (IMD) Shillong, kila pynmih ia ka jingmaham halor ka jinglong jingman jong ka suinbneng da kaba pyntip ba kan don ka eriong ryngkat bad ka jingpom u pyrthat bad ka jingslap jur ha kylleng ki bynta jong ka jylla.
Katkum ka jingbthah, ki jaka kiban shah ktah ki kynthup ia ka East Jaintia Hills, East Khasi Hills bad ka West Jaintia Hills. Ka jinglong jingman jong ka suinbneng kadei kaba la khmih lynti ba ha ki 3 kynta kiban wan naduh ka jingpynmih ia kane ka jingbthah hapdeng ka por 5:00 janmiet bad 8:00 mynmiet jong ka 10 tarik u Jymmang.
La kyntu ia ki paidbah kiba shong ba sah ha kitei ki thain ba kin long kiba husiar bad kiba phikir bad ban shim ia ki lad jingiada. Ka SDMA kala ai jingbthah ban shong hapoh iing ha ka por ba don ka jingpom u pyrthat bad ban kiar ban leit ha ki jaka kiba thylli, ki dieng ne ki jingtei kiba don ia ki nar.
Kane ka jingbthah kadei da ka jingthmu ban pynthikna ia ka jingshngain ia ki paidbah bad ban pynduna ia kano kano ka jingma kaba iadei bad ka jinglong jingman ka suinbneng ha kum kane ka por ba ka suinbneng kam long kaba biang.
