Guwahati, Lber 15: U nongaiktien ka party Congress na Assam Reetam Singh uba dei ruh u nongiasaid ain, u la shah kem na Guwahati ha ka step sngi saitjain ha ki pulit ka Lakhimpur, ha ryngkat ka jingiarap ki pulit ka Guwahati.
Kane ka jingkem ka long hadien ka ejahar ba la ujor da ka kurim jong u MLA ka BJP ka Lakhimpur u Manab Deka halor ka jingkynthoh pyrshah jong u Singh ha ka social media.
Ia kane ka mukotduma (No. 91/2025) la ujor hapoh ka kyndon 356(2) jong ka Bharatiya Nyaya Sanhita (BNS) bad bun tylli ki kyndon jong ka IT Act. U Singh u la buh jingkylli balei ba ki nongïalam ka BJP kiba la shah kynnoh ba ki leh beijot ïa ka kynthei-ba kynthup ïa u Manab Deka, u president barim jong ka BJP u Bhabesh Kalita, bad u Rajen Gohain, myntri barim ka sorkar pdeng – kim shym la mad ïa ki jingeh ha ka liang ka aiñ.
Ka post jong u ha u X ka ong: “Kine ki nongleh kam sniew ki la ioh ia ka jingpynshitom kaba ki dei hok ban ioh. Hynrei kumno shaphang ki Myntri bad ki MLA kiba shah kynnoh @BJP4Assam kum u Manab Deka, u Ex President Party u Bhabesh Kalita, u myntri barim u Rajen Gohain?” Hadien kata ka tnga jong ka Deka ka la ujor FIR, da kaba dawa ba u Singh un pynshisha ba u tnga jong ka u dei u nongleh beijot.
Kane kam dei ka sien kaba nyngkong eh jong u Singh bad ka ain, Ha u Ïaiong 2024, tang shuwa ka elekshon Lok Sabha, u la shah kem namar ba u la pynsaphriang ïa ka video jong u Amit Shah, myntri kam pohïing ka sorkar pdeng bad ba u la pynphriang ïa ki jingthoh kiba kren beiñ ha ki social media.
Ka jingshah kem jong u Singh ka la pynmih ïa ka jingkulmar ha ka saiñ pyrthei, ha kaba ki nongïalam ka Congress ki la kynnoh ïa ka sorkar Assam ba la ïalam da ka BJP ba ka pyndonkam da ki tiar ïaleh ïa ki bor pynjari aiñ. U MP ba rangbah jong ka seng Congress, u Gaurav Gogoi, ula pynrem jur ia katei ka jingleh, da kaba ong ba katei ka dei ka jing thombor kaba paw pyrthei ia ka jingkren laitluid.
“Ka kynhun ki pulit ka Lakhimpur ki la poi ha Guwahati bad ki la kem jubor ia u Reetam Singh. Ynda nga la poi ha ka jaka sah jong u, ki pulit ki la kyntait wat ia ka hok jong nga ban iakren bad u”, la kynnoh u Gogoi.
“Khyndiat sngi mynshwa, ki nongtrei ka BJP ki la thombor ïa arngut ki pulit Assam ha ka por mynsngi, hynrei ym shym la leh eiei. Hynrei haba u nongïalam ka Congress u tweet ïa kaei kaei, ka jingle ki pulit ka long kumba u leh ia ki kam sniew ba shyrkhei bad hato u Amit Shah u matlah ïa kane ka jingpyndonkam bakla ïa ka bor kaba paw shynna hapoh u Himanta Biswa Sarma?” la ong u Gogoi.
Ki nongïalam ka Congress ki la jer kyrteng ïa ka jingkem ïa u Singh kum “ka jingleh donbor” bad ki la kynnoh ba ka BJP ka ïada ïa la ki jong ki dkhot na ka jingshah pynngat ha ka aiñ. U Gogoi u la kynthoh shuh shuh ba ki pulit Assam kila shah pyndonkam kum ka atiar sain pyrthei, da kaba maham ba kum kine ki kam ki lah ban pynsniew ia ka jingshaniah jong ki.
“Ka Supreme Court ka la bthah bunsien ïa ki pulit ba kin leh katkum ka aiñ, hynrei hapoh ka jingialam u Himanta Biswa Sarma, ki pulit Assam ki shah pynbor ban pynshitom beiñ ïa ka saiñpyrthei,” u la ong. Ka por ba la kem ïa u—kaba ïahap bad ka jingleit jong u Amit Shah sha Assam—ka la pynmih shuh shuh ïa ki jingkynnoh ba ka BJP ka pyndonkam ïa ki bor pynjari aiñ ban pynsngap jar ïa ki sur jong ki nongpyrshah.
Haba ka dorbar jong ka Assam ka la jan, la khmih lynti ba ka jingshah set jong u Singh kan long ka jingïakynad kaba khraw hapdeng ka BJP kaba synshar bad ka Congress. Ka liang pyrshah ka la byrngem ban ïakhun pyrshah ïa katei ka jingshah kem.
