Tura, Naiwieng 7: Ka rilum Garo kala pynkhreh ban rakhe ia ka Wangala Festival, kawei na ki jingrakhe ainguh ia ka jingseisoh ka rep ka riang ha ka jylla Meghalaya, kala pynkhreh shaid shaid ia ka jingrakhe ia ka jubili ksiar ha kaba ka jingiashimbynta kan kynthup syndon ia ka jingtem ia ki 1,000 tylli ki Ksing ne ‘Drums’.
Kane ka sienjam kaba mynta, yn sakhi ia ka jingtem ia ki ksing kaba na ka 100 tylli kaban kiew syndon shiphew shah, bad ki nongpyniaid ki khmih lynti bad thaw ia ka rekod jong ki nongwan iashimbynta ban tem ia ki ksing, ki nongwankai bad ki kynhun pyninam ia ka kolshor. La khot sngewbha ruh ia ka kynhun jong ka Guinness World Records ban sakhi bad ban bishar bniah ia kane ka jingtem ksing kaban sah nam ha ka histori.
U Rakkan Sangma, Joint Secretary jongka High-Level Wangala Festival Committee (HDWFC), ula ong ba ka jingtem ia ka ksing kaba 1000 tylli kan dei ka khyllipmat kaban sah nam ia ka Garo Hills.
“Na ka bynta ka jingtem ia ki 1,000 tylli ki ksing, ngi lah long kiba dap da ka jingkmen namar ba kane kan dei ka histori ia ka rilum Garo. Kaba kongsan tam eh kadei ka bynta jong ka kynhun ka Guinness World Records kaban wan ban rekod ia kane bad kan sa pynrung ha ka thup ban sah jingkynmaw jong ka pyrthei” ong u Sangma.
Haba batai shaphang kane ka jingrakhe ia ka jubili ksiar, ka long ka jingsngewsarong shimet ialade, ula ong, ba u long uba donbok bha ban ioh ban sakhi ia u mawjam jong kane ka jingrakhe.
U Sangma ula ialam ruh ia ka kynhun jong ka SHLEM ban peit ia ka Nok A•chik, ban batai shaphang ki jingleh tynrai bad ia ka kolshor kaba iadei bad ki riewngeit kiba mane ia u Misi Saljong, uba la niew kum u nongai uba khraw, hapdeng ki riewngeit jong ka Songsarek.
Ka Shad Wangala kadei kaba la sdang nyngkong eh da kaba tem tang ia 10 tylli ki ksing kaba la pynlong ha madan Chutmari ha u snem 1976. Hadien katei ka snem, u Myntri Rangbah ka Jylla u Captain W.A. Sangma ula pynshlur ban pyniar ia kane ka jingrakhe da kaba tem ia 100 tylli ki ksing ha Asanang, uba la buh ia u mawnongrim ia kaba la kylla long syndon kum kawei na ki shad ne jinglehkmen tynrai ia ka kolshor jong ka Jylla Meghalaya.
U Media Convener u JC James ula ong, ka jinglong ha sawdong sawkun kala pyni ia ka jingkmen lypa ban rakhe ia ka jubili ksiar bad kadei kaba la saphriang shabar jong ka Jylla Meghalaya, ha kaba ki nongwankai bad ki kynhun pyninam ia ka kolshor kiba na ki Jylla kiba marjan kidei kiba la khmih lynti, kiba kynthup na Assam bad Tripura.
“Ki paitbah kila thrang dik dik. Baroh ki kwah mynta ban wan sha Wangala Adam” ong u James bad ka kdew ba kala don ka jingkiew bha jong ki briew kiba wankai bad ki kali sha ka jaka kaba pynlong ia katei ka Shad Wangala.
“Da ki spah ki spah tylli ki kali lah ban ioh ba ki pynieng hangne. Ngi khmih lynti ba ki briew kin wan bun bah namar ba kila thrang dik dik ban iohi ha ka sien kaba nyngkong eh ia ka jingtem ia ki 1000 tylli ki ksing. Ka committee kala dep ban khot sngewbha ia ka kynhun jong ka Guinness World Records” ula bynrap.
Ha kane ka jingrakhe bad jinglehkmen la khmih lynti ban wanrah ia ki kynhun shad tynrai bad ki Mahari kiba mihkhmat ia ki jaidbynriew Garo ki bapher bapher ban pyni ia ka jingiar jong ka kolshor bad ka jingbynta lang ia ka tynrai kaba naduh hyndai hynthai.
Haba kane ka tamasa kan dap 50 snem naduh ba la sdang ia ka, ki nongpyniaid kila ong, ba ka jingiashimbynta jong ki samla kan long pdeng bha na ka bynta ban pynneh pynsah bad ban rah shakhmat ia kane ka riti, dustur bad kolshor tynrai.
