New Delhi, Lber 15 : U Myntri Rangbah ka Jylla Conrad K Sangma ula shah jied biang kum u National President jong ka National People’s Party (NPP) ha ka sien kaba saw hynne ka sngi Saitjain.
U Conrad ula shah jied khlem kano kano ka jingialeh pyrshah ban ialam biang ia ka NPP na ka bynta ka samoi treikam 2025-28.
Ia ka elekshon jong ka party la pynlong ha ka Constitutional Club of India, New Delhi ha ka sngi Saitjain.
U Conrad Sanga u la shah jied nyngkong eh kum u National President ha u snem 2016 hadien ka jingkhlad noh u Kpa (L) Purno A Sangma, ha une u snem namar ka jingpang. Ula shah jied biang ban bat ia kane ka shuki ba hakhlieh duh jong ka party ha u snem 2019, 2022 bad mynta u 2025.
Ha kajuh ka por, u Myntri Sorkar barim bad Working President ka Arunachal Pradesh Paknga Bage ula shah jied khlem ka jingialeh pyrshah kum u General Secretary (Organisation) katba ka Dr Mehtab Agitok Sangma kala shah jied biang khlem ka jingialeh pyrshah kum ka National Treasurer.
Nalor kane, u President ka NPP-Meghalaya Bah Prestone Tynsong bad President ka NPP-Manipur Joy Kumar Singh kila ai jingmut ban thung ia u James K Sangma, u General Secretary (Organisation) barim, kum u National Working President jong ka party.
U Conrad Sangma ula pynbna ba ia ki dkhot jong ka National Committee 2025-28 yn sa pynbna noh shen.
Ka NPP ka dei ka party ba nyngkong eh na ka thain Shatei Lam Mihngi ban ioh ia ka jingithuh kum ka National Party ha ka Election Commission of India (ECI) ha u snem 2019.
 ha ka sien kaba saw hynne ka sngi Saitjain.){kind=link}