Shillong Nailar 30: U Myntri ka tnad Kam pohiing ka jylla Bah Lahkmen Rymbui hynne ka sngi u la buh ia u mawnongrim ban shna noh ia ka surok na Kudengrim sha Kudengthymmai.
La sakhi lang ia kane da u u Director of Tnad Tourism Bah Cyril V.D Diengdoh, IAS, Chief Engineer (Standard), PWD (Roads) B.P Mark.
Ka jingtei ia katei ka surok kaba 5.14 KM na Kudengtim sha Kudengthymmai la bei tyngka da ka New Development Bank (NDB) lyngba ka Meghalaya Eco Tourism Infrastructure Development Project (METIDP) kaba kot sha ka 17.6375 klur katkum ka DPR bad ka Public Works Department (PWD) kum ka implementing agency jong kane ka projek.
Haba kren ha ka jingialang u Myntri u la ai khublei ruh ia ki trai shnong kiba la ai sngewbha ia ki jaka jong ki na ka bynta ban shna ia ka surok na ka bynta ki kam pynroi Jong ka thain ha baroh ki liang.”Nga Kyrmen ba kane ka surok bad ki artylli ki jingkieng ban sa shna shen na ka bynta ban kyntiew ia ka kam jngohkai pyrthei ha kane ka thaiñ.”
Shuh shuh u ong ruh ba ka thong jong u ka long ban pynbha ia ki surok naduh Shnongpdeng sha Amkoi ban kyntiew jaka jngohkai ha ka thain da ka jingai jaka ki trai shnong. U pan ruh ka jingiatreilang na ki paidbah na ka bynta ban kyntiew ia ka constituency baroh kawei.
Na ka liang u Director ka tnad Tourism, Bah Cyril Diengdoh u la ong ba kane ka thain ka khring bun bha ki nongjngohkai pyrthei na ka jingdon ki jaka ba itynnad. Kumta u kyntu ia ki paidbah ka thain ban shim kabu ia kitei ki skim jong ka sorkar. U ong ruh ba da ka jingshna ia ki surok ka don ka jingkyrmen ba ka kam jngohkai pyrthei hangtei kan kiew stet bad kyntiew ia ka ioh ka kot jong ka jylla.
U BP Marak pat u la ong ba katei ka surok ba 5.14 KM kan pyniasoh ia bun tylli ki shnong ba kynthup naduh ka Konglah, Nongbareh, Amkoi, Kudengrim bad ka surok NH 40 E nalor ba ka pynduna ruh ia ka jingjngai ban poi sha ka CHC bad College aba don ha Nongtalang.
