Shillong, Nailar 30: U Chief Executive Member ka KHADC bah Titosstarwell Chyne hynne ka sngi ula plie ia ka kor CCTV bad ki kor pynsawa ha Iewduh kum shibynta ban wanrah iaka jingshngain ki nongdie bad ki nongthied nongpet.
U CEM ula buh ruh ia u mawnongrim ban tei iaka iew bathymmai ha Iew Dielang kaban kot 4 klur tyngka tam.
Ha kane ka jingialang la iadonlang ka EM kaba khmih iaka Market ka Kong Grace Mary Kharpuri, u EM uba khmih iaka khaii pateng u Bah Rangkynsai Kharbuki, u EM uba khmih iaka Elaka u Bah Jambor War, u Acting Syiem ka Hima Mylliem u Ainam Manik Syiem ki myntri bad ki bakhraw jong ka Hima Mylliem.
U Paiem Ainam Manik Syiem ula ong, baroh shi katta kila don ki kam sniew kiba la jia hapoh iewduh bad ka long kaba kongsan ban buh iaki CCTV bad ki kor pynsawa khnang ban wanrah iaka jingshngain.
Ula ong ba shen, yn tei noh iaka iew kaba thymmai ha iew Dielang kaban long 3 mala bad ia mynta yn tei shwa tang iaka Ground Floor ha ka jinglut jingsep kaba kot 1 Klur tyngka tam bad la buh por ban shna pyndep hapoh 6 bnai bad ia ki mala kiba dang sah yn sa tei hadien.
U Bah Titos ula ong, bun ki samla ki ud iaka jingbym iohkam, kumta ka iewduh kadei ban long ka lad ban aikam aijam iaki samla bad ula ong, ki trai dukan kidei ban shimti noh halade ban pyniaid ia ki dukan bad lada kim lah ban pyniaid hi, kidei ban aiti noh sha ka Hima Mylliem khnang ba yn ioh ban aiti ha ki samla khlem kam ba kin
ioh seng kam.
U Bah Titosstar ula ong, ka Council kala khang ban pyndonkam iaki plastik bad ula maham ban phah pynlong iaka jingkhynra bad lada lap yn leh da kaba tyngeh hynrei lada dei ki bym dei Khasi yn hap ban pynduh noh iaka Trading License ka jongki.
Nalor kane u la ong, ka Hima Mylliem kadei ban pynthikna ban ym don kiba die kyiad pyrsi, khalai bad kam awria, khnang ba ka Iewduh kan ym shah pynbud nam bad ula kyntu ruh ba dei ban pynlong iaka jingpynkhuid iew man la ka por ban wanrah iaka jingkhuid jingsuba.
