Ka jaka ba 137 acre kam dei satia kaba ithuh kum ka jaka khlaw
Shillong, Lber 06: U Myntri Rangbah ka Jylla Conrad K Sangma ha ka sngi Palei, ula pyntip ba ka jaka ba 137 acre ba la tyrwa pynkylla ia ka Industrial Estate kaba biang nadong hadong ha Byrnihat kam dei satia ka jaka khlaw haba kular ruh ba ka Sorkar kan pyniaid shakhmat ia ka kam satang ynda ioh ia ka jingmynjur ki padbah.
“Ai ba ngan pynshai ia kawei ka jingsngewthuh bakla….kane kam dei ka jaka bala ithuh kum ka khlaw haduh mynta” ong u Conrad haba jubab ia ka mat iatai ba lyngkot ha Iingdorbar, kaba la wanrah da u MLA ka VPP na Mawryngkneng kaba iadei bad ka jingtyrwa pynkylla ia ka jaka khlaw sha ka Industrial Estate ha Byrnihat.
“Kaba ar, kam dei satia kaba ngi shu shim ia kane ka jaka bad lashai lashai hi kin mih ki karkhana. Ka kam kaba ngi sdang ia mynta ka long ban aiti ia ka jaka na ka Tnad Soil & Conservation bad tnad Horticulture sha ka Sorkar. Tang kane hi. Kam pat don eiei ia mynta” ula ong haba bynrap “Ka daw balei ba ngi leh ia kane ka long ba kane ka jaka ka dei ba ia mynta ki kam ki dang iaid jong ka Tnad Hoticulture bad ruh ki jingai jinghikai. Ki don 2-3 tylli ki jingai jinghikai ba dang iaid bad ka Sorkar ka sngew ba kane ka jaka ka dei ka bym da pyndonkam bha bad iohi ba shibun kiei kiei lah ban leh ha kane ka jaka bad kumta ngi la rai kawei ba ia kane ka jaka dei ban aiti noh sha ka Sorkar”.
U iathuh ba ia kine ki artylli ki tnad yn sa ai bujli ia ka jaka sha kiwei ki jaka khnang na ka bynta ki jaka bala aiti noh sha ka Sorkar.
“Ka jingheh jong kane ka jaka kam dei satia da ki hajar acre, ka dei 137 acre ha kaba 127 acre ka dei jong ka Tnad Soil bad 10 acre ka dei jong ka Tnad Horticulture” ong u Conrad haba pyntip ba 55.9% na kane ka jaka ka dei ka madan khah.
Ha kajuh ka por, u Myntri Rangbah ula iai ban ba ka jingkylli kam mih satia ba kan don ka jingiaid lait ia ka Land Transfer Act haba pyntreikam ia ka Meghalaya Investment Promotion Agency (MIPA).
“Ka don ka jingsngewkhia ba ngin sa ai jaka sha ki kompani shimet bad iaid lait ia ka Land Transfer Act. Ka jingkylli kam mih satia ban iaid lait ia ka LT Act. Ka dei ka ain ba kongsan bha kaba ngi don bad kaba la iada ia ki paidbah jong ngi da ki snem bad ym don satia kino kino ki agency kiba lah ban iaid palat ia kane ka ain bala mynjur da kane ka Iingdorbar” ula ong.
“Kumta ai ba kan shai ba kam nym don satia ka jingaiti ia ka hok longtrai ia ki jaka da ka MIPA. Ki sienjam bala pyntreikam ha ki por bala leit noh lyngba ka MIDC, MeEC bad kiwei kiwei ki long kumjuh hi. Ka jingkylli ba ka MIPA ka ioh bor kyrpang ruh kam mih satia…Ia ka MIPA la wanrah ban pynsuk ia ka jingwan kynshew kam bad kan bud ia ujuh u shabuk, kijuh ki rule bala bud da kiwei ki Agency jong ka Sorkar. Ka jingkylli ba ngin iaid lait ia ki paidbah, nongialam shnong, ki ain kin ym mih satia” ula bynrap.
