Shillong, Lber 06: Ka Sorkar Jylla kala mang T.10 Klur ban tei ia ki 35 tylli ki Hatchery (jaka pynkha symbai dohkha) ban kyntiew ia ka jingpynmih dohkha ha ka jylla.
Haba jubab ha ka kynta kylli jingkylli, u Myntri Rangbah u Conrad K Sangma ha ka sngi Palei ula ong, “Ki kam kin sa sdang noh shen bad hadien ba ngi lah pyndep ia ka jingtei, ka jylla kan sa don 96 tylli ki Hatchery”.
“Kumba long mynta, ngi don 61 tylli ki Hatchery kiba pynmih 24.7 Million tylli ki symbai dohkha” ula ong.
U Conrad Sangma ula ong ba ka jingpynmih dohkha ha ka jylla kala kiew sha ka 20,000 metric ton na ka 4000 metric ton hashwa ban pyntreikam ia ka aqua culture mission.
“Hynrei ka jingdonkam dohkha baroh ka long 32,000 metric ton, ka jylla ka dang hap ban wanrah haduh 12,000 metric ton ka dohkha nabar jong ka jylla” ula ong haba pynbna ba ka sorkar shen kan sdang noh ia ka aquaculture mission kaba thymmai.
Kane ka mission kan donkam sa 4000 Hectar ka jaka ban pynlong ia ka jylla kaba lah ban pyndap pynbiang ia ka jingpynmih ia ka dohkha, ula ong.
Nalor kane u Myntri Rangbah ula pyntip ba 778 metric ton u jingbam dohkha la lah ban pynmih na ka jingdonkam kaba kot 30,000 metric ton. “Ka sorkar kala bhah ia ka tyngka ban seng ia ki 12 tylli ki Feed Mill kiba thymmai bad ban kyntiew noh ia ki 17 ki Feed Mill kiba la don lypa” ula ong.
Hashwa kane, u Conrad Sangma ula pyntip ba kila don 3230 tylli ki pung dohkha kiba la tei lyngba ki skhim ki bapher bapher naduh u snem 2020 haduh u 2024 bad la mang T.9768.29394 Lak haduh mynta.
 ban kyntiew ia ka jingpynmih dohkha ha ka jylla.){kind=link}