Shillong, Rymphang 13 : U Myntri Sorkar Marcuise N Marak ha ka sngi Palei,ula ong ba ka jingkylli kam mih satia ba ka Sorkar Jylla kan pynshlur ia ka kam tih dewiong beain bad kiwei kiwei ki kam beain hapoh ka Jylla.
“Kumno ka Sorkar kan iatreilang bad kine ki kam beain. Hato phi pyrkhat ba ka Sorkar Jylla kan pyn shlur ia kum kine ki kam beain?. Ka Sorkar MDA jong ngi ka treikam haba shai bad phi lah ban ioh ia ki sienjam bala shim da u Myntri Rangbah ka Jylla Conrad K Sangma, ka lynti ba u ialam ia ka Jylla kaba phi lah ban iohi hi dalade “ ula ong.
U Myntri ula ong ba lada don kiba iohi ia kine ki kam beain, dei ban wanrah sha ka jingtip jong ka Sorkar namar ngi don hangne ban khang ia kine kiei kiei baroh.
U Marcuise ula kren ia kane haba kynthoh ia ki jingkynnoh jong ki Liang Pyrshah haba kdew ia ka interim report ba dang shen bala phah da u Justice (Retired) BP Katakey.
Haba kyntait ba ka don ka jingtih dewiong beain, u Myntri ula ong “Kam don satia kum kane ka kam ha ka kynhun. Lada ka don, ka bor ka don ban kem ia ki bad nga tharai kila don ki nongkhaii kiba la dep ban ai jubab kaba la leit sha ki bor District. Ngam tharai ba kan don ka jingtih dewiong beain ha South Garo Hills”.
