Shillong, Rymphang 13: Ka BJP Meghalaya kala iakynduh ia u Myntri ka Sorkar Pdeng ba khmih ia ka Minority Affairs Kiren Rijiju bad kyrpad ban kyntiew kyrdan noh ia ka Red Cross Hospital, Laban namar ba ka dei ka jaka ai jingsumar kaba la rim bad la donkam ban tei noh da ka iing building kaba thymmai.
Ka BJP hapoh ka jingialam u MLA u Bah Sanbor Shullai bad u President ka BJP Meghalaya u Rikman Momin mynta u bnai kila iakynduh ia u Kiren Rijiju ha kaba kila aiti ia ka jingtyrwa ban kyntiew noh ia ka Red Cross Hospital, Laban.
U Bah Sanbor Shullai ula pynpaw ba ka Red Cross Hospital kaba don ha ka South Shillong Constituency ka donkam ban tei thymmai noh khnang ba da ki hajar ngut ki longing baduk kin lah ban bteng ban ioh ia ka jingsumar kaba paka.
Ula bynrap ba dei ha kane ka hospital ba la kha ia u kumta dei ban pynlong ia ka kum ka hospital kaba biang tam ban kha khunlung hapoh ka nongbah Shillong.
U MLA ula pynpaw ruh ba ha katei ka jingiakren, u Myntri ka Sorkar Pdeng ula pyni ia ka jingkloi ban tei thymmai ia katei ka hospital bad ban aiti ia ka Detailed Project Report sha ka Minority Affairs hadien ka elekshon.
Kane ka kynhun jong ka seng BJP kala pyntip ba kan sa leit iakynduh noh shen ia u Myntri Rangbah ka jylla ban kyrpad ia u ban phah ia ka jingtyrwa sha ka Minority Affairs jongka Sorkar Pdeng.
U Bah Sabor ula kular ba yn ialeh ban pynurlong shisha ia ka jingpynkylla ia kane ka hospital hapoh kane ka samoi treikam ka jongu.
U MLA ka BJP ula banjur ruh ba dei ban trei bun ia ka kam bad ban kren duna bad kane kadei ban long ka buit ha ka kam sain pyrthei.
