Shillong, Rymphang 12 : U President ka NPP-Meghalaya bad Symbud Myntri Rangbah Bah Prestone Tynsong ha ka sngi Balang ula thalain ia ka Sorkar ba ialam u Dr Mukul Sangma namar ka jingleh politics halor ka C&RD Block jong ka Wapung da kaba pynkynriah ia ka headquarter sha Lumshnong.
Ula phla ruh ba dei kane ka daw ha lyndet ka rai jong u ban mih noh na ka congress bad rung sha ka NPP, kaba la pynkylla pat hadien ia ka jingpynbna.
U Bah Prestone ula kren ia kane ha ka rynsan ialap elekshon ha shnong Wapung, East Jaintia Hills ban pan jingkyrshan ia u MDC ba mynta na Musniang-Rangad constiyuency Bah Phasmon Dkhar ha kane ka elekshon ban wan ka JHADC, ban long la 21 tarik Rymphang.
“Ha ka por ba nga bat ia ka tnad C&RD haba u Dr Mukul Sangma u dang dei u Myntri Rangbah, ngi la pynmih iaka jingpyn bna bad ai ka hukum ba ka Block Headquarter kan don ha shnong Wapung hynrei namar ka politics tang hashuwa ka elekshon (2018), kynsan kynsan kila pynmih ia ka jingpynbna ban pynkynriah ia ka block sha Lumshnong. Kane ka dei ka daw ba nga la rai ban mih noh na ka Congress namar kum u Myntri ka C&RD, nga la kyrpad ia ka shnong Wapung ba kan ai jaka ei ban buh ia kane ka Block” ong u Bah Prestone.
“Nga mih na ka congress bad rung mardor sha ka NPP. Ka khyllipmat ba ngi shimti ia ka Sorkar ha u snem 2018, ngi kum ka Sorkar ba ialam ka NPP, ngi la pynkylla ia kane ka jingpynbna ban kular b aka Block Office kan don beit ha Wapung kumba la rai naduh kaba nyngkong” ula bynrap.
Ula kam ruh ba ka Sorkar ba ialam ka NPP kala lah ban wanrah shibun ki kam pynroi hapoh ka Jylla ha kine ki 6-7 snem bala leit noh.
Haba kyntu ia ki paidbah ka constituency ban pynjop biang ia u Bah Dkhar, u Bah Tynsong ula ong “Nga kyrpad ia phi baroh ban shah ia u Bah Dkhar ban long ka jingkieng hapdeng ka constituency bad ka Sorkar, u Myntri Rangbah, ki Symbud Myntri Rangbah khnang ba un lah ban wanrah hakhmat jong ngi ia baroh ki jingdonkam bad jingangnud jong ki paidbah”.
“Nga kyrpad ruh ia ki paidbah ba kin ai ka jingkyrshan ba pura ia ka NPP khnang ba ngin lah thaw ia ka Executive Committee ba thymmai ha JHADC ban pynthikna ia ka roi ka par ha baroh ki liang hapoh ka constituency bad ka thain baroh kawei” ula bynrap.
