Shillong, Rymphang 12: Da ka jingthmu ban kyntiew ia ka jingshngain bad ka jingshakri ha ki jaka ka Cantonment ha nongbah Shillong, u Mission Director DREAM mission ryngkat ka jongiatreilang bad ka Superintendent of Police (SP) ka East Khasi Hills (EKH), kila iakynduh ia u CEO ka Cantonment Board, Shillong u Ayush Maurya, ha ka 11 tarik u Rymphang ban iatai ia ka jingdonkam ban shim ia ki sienjam ban wanrah ia ka jingshngain ia ki paidbah.
Ha katei ka jingialang la mynjur ban pynlong lang ia ka jingialang ne ka Joint Meeting man la ka por bad ban ia jurip lang ban khmih ia ka jinglong jingman. Kane ka jingiatreilang ka long da ka jingthmu ban pynthikna ba baroh ki nongshong shnong kin ioh ia ka jingshngain.
Ka mat kaba kongsan kaba la iatai ha ka jingialang kad ei halor ka jingdon ki jaka kiba shong ba sah da ki briew kiba shu wan rungtuh khamtam haba ki jaka jong ka Cantonment kim hap ha u pud u sam jong ki Dorbar Shnong bad kane kala buh ha ka jingeh kaba khraw.
Ban weng ia katei ka jingeh donkam ban pyntreikam da ka buit treikam ne ka Strategic Infiltration Control Plan ban pynthikna ba ka iaid ka ieng jong ki briew ki bym pat ioh jingithuh ka dei ia kaban khmih bniah bad ban tehlakam.
Ban wanrah ia ka jingshngain ia ki paidbah, la pyndait ia ki CCTV Camera ha ki jaka kiba kongsan kiba hap ha ka Cantonment. Kane ka sienjam kadei da ka jingthmu ban pynkhlain ia ki kam kiba iadei bad ka jingai jingshngain ban tehlakam ia ki kam sniew bad ban pynbiang ia ka jingpeitngor na ka bynta kiba bat ia ka ain.
Nalor kane la khmih lynti ba ka jingbuh ia ki CCTV kan iarap ha kaban na ki kam sniew khamtam ha kaba iadei bad u drok, kaba long ka jingsngewkhia kaba jur hapoh ka thain.
U Mission Director ka DREAM mission u Bah F Kharshiing ula pynpaw ia ka jingsngewnguh ia u CEO jongka Cantonment Board, Shillong, halor ka jingshimkhia halor ki mat kiba ktah ia ka shongsuk shongshngain bad ban ai ia ka jingkyrshan kaba pura ia ki jingai jingmut.
Kane ka jingiatreilang kan long ka sienjam kaba kongsan bha ha ka jingbteng ban shimkhia bad ban py thikna ban pynlong ia ka nongbah Shillong kaba shngain.
