Shillong, K’lyngkot 15 : U National President ka NPP bad Myntri Rangbah ka Jylla Conrad K Sangma ha ka sngi Balang ula pynpaw ia ka jingsngewskhem ba ka NPP kan jop ha kane ka elekshon ban wan jong ki artylli ki Autonomous District Council (ADC) ka Ri-lum Khasi bad Jaintia, ka ban long ha ka 21 tarik u Rymphang.
“Man ki elekshon ki dei kiba iapher, man ki elekshon ki dei kiba hap iakhun bad ka jingkylli kam mih satia ba ngi sngew bala jop beit. Ngi donkam ban trei shitom bad ngi kyrmen ba ki kam kin iaid ha ka lynti kaba dei bad ngin jop ia ka elekshon MDC ha KHADC bad JHADC” ong u Conrad haba iaken bad ki nongthoh khubor.
U pyntop ba ka NPP kala dep shong ia ka jingialang bishar kam bad ki kyrtong ka elekshon na KHADC bad JHADC bad ong “Ngi ioh ia ka khubor kaba sngewtynnad. Hynrei ki don beit ki jingtynjuh bad ngi hap ban trei shitom. Ki kyrtong jong ki, kila don mynta sha ki shnong ki thaw katba ngi dang iakren hangne. Kumjuh ruh ki nongialam kila pynkhreh ha baroh kawei ka Jylla bad kila iatrei khlem thait na ka bynta kane ka elekshon”.
U Conrad ula bynrap ba ki jingpynkhreh hi na ka liang jong ka Sorkar ka long ba kan shim ia baroh ki sienjam ba dei ban shim ha kaban pynthikna ba ka jingpynlong ia ka elekshon kine ki artylli ki ADC kan long kaba iaid beit iaid ryntih.
Haba kubor ba ka jingsngew isih Sorkar ka dei kaei kaei kaba ki Sorkar kim lah ban kiar, u Myntri Rangbah ula ong “Hynrei lada phi peit ia ki kam kiba la leh da ka EC ka NPP ha KHADC, shibun ki bill kiba la don, shibun ki ishu ba sahteng ki bym shym la leh eiei ha ki por bala leit noh, la lah ban pyndep da kane ka EC ba mynta. Kumta, ym don ba lah ban ong b aka EC kala pheil ha ka jingtreikam”.
“Hooid, ki don shibun ki jingtynjuh, shibun ki ishu hynrei kane ka EC ka NPP kala leh shibun ki kam bad shibun ki project ba kongsan kum ka jingbei tyngka ia ki nongwad bniah (researcher) ba kin lum jingthoh shaphang ka kolshor uKhasi, ka ktien ka thylliej bad kiwei kiwei. Kine ki dei ki kam kiba itynnad ba kumno kane ka EC ka treikam ban ialam shakhmat ia ka thain bad ia ka District Council” ula ong haba bynrap “ Ki Liang Pyrshah ki lah ban ong shibun kiei kiei hynrei kane ka EC kala treikam bha bad kala pyndep ia shibun ki kam ba sahteng, shibun ki kam ba dang sah bad ngin sa bteng ban leh shibun ki kam ha ki snem ban wan”.
Halor ka jingpyrshang ban pyniakhleh ia ka niam bad ka kam sain pyrthei, une u Khliehduh ka NPP ula ong “Ngam don eiei ban kynthoh halor kane, kane ka shong beit ha kita ki seng sain pyrthei ba kumno ki kwah ban leh ia kane bad nga tharai ka imlang sahlang ka kwah ba ngi dei ban nym pyniakhleh ia ka niam bad ka kam sain pyrthei. Nga tharai ka imlang sahlang kan sa rai bad ki paidbah kin sa rai hashuwa ban leit thep vote. Ngam don eiei ban kynthoh ia kane”.
