Shillong, Kyllalyngot 09: Ka sorkar Meghalaya kala pynkhreh ban phah sa ia kawei pat ka kynhun ki Doctor sha Tamil Nadu mynta u bnai na ka bynta ban pyntbit ha ka kam ban ai jingsumar kaba dei ka jingiatreilang hapdeng jong ki ar tylli ki jylla.
U Principal Secretary ka Koit ka Khiah u Sampath Kumar, ula pynthikna ia kane ha ka jingiakynduh kaba dang shen da kaba banjur ia ka jingiengskhem ka jylla ban pynkhlain ia ka jingai jingsumar ha ki thain nongkyndong.
“Ngi dang pynkhreh ban phah sa ia kawei ka kynhun hapoh jong une u bnai” la ong u Kumar.
“U Ram Kumar S uba long u Secretary ka Koit ka Khiah dang shen ula leit iakynduh ia u Additional Chief Secretary ka Tamil Nadu na ka bynta ban pynthikna ia katei ka jingthmu”.
Ia kane ka training program, la sdang lyngba ka jingiasoi ia ka Memorandum of Understanding (MoU) ha u 2022 hapdeng ka Meghalaya bad Tamil Nadu, ban pynkup bor ia ki doctor da ki sap kiba kyrpang ha kaba iadei bad ka Comprehensive Emergency Obstetric Care, Life-Saving Anesthetic Skills bad ka Ultrasonography. Kane ka jingthmu ka long ban iaid ryngkat bad ka Chief Minister’s Safe Motherhood Scheme (CM-SMS) bad ka thong ka long ban pynduna ia ka jingiap ki kmie kiba pun khun ne ki khunlung kiba dang shu kha ha kylleng jong ka jylla Meghalaya.
U Kumar ula pynpaw ba kane ka prokram kala wanrah ia ka jingkylla bad ula pyntip kumba 100 ngut ki doctor kila ioh jinghikai pyntbit lyngba katei ka sienjam bad la buh ia ki ha ki jaka kiba don ha kyndong bha jong ka jylla.
“Nuksa, ha Pynursla CHC, ngi lah duh noh ia kawei ka kmie namar ka jingbym don ia ki kor Ultrasound, mynta ngi lah don ia ki Doctor kiba la tbit ha ka Ultrasonography,” ula ong bad ka bynrap, “Kane ka long ka sienjam kaba kongsan bha ha kaban pyniar ia ka jingai jingshakri ha ka koit ka khiah ha ki jaka kiba donkam bha”.
U Kumar ula iaroh ruh ia ka kam kaba la leh da ki shnong ki thaw kum ki Village Health Councils kiba la kyrshan ban wanrah ia ka jingkylla ia ka jingai jingsumar ha ka jylla Meghalaya.
“Ki shnong ki thaw ki long ka bor ia ka Meghalaya. Ha ka shnong Wahlyngdoh ka Village Health Council kala pynthikna ia ka 100% ka jingkha ia ki khunlung ha ki jaka sumar watla ka jaka ka long kaba bun bha ki riat. Ka jingtrei shitom ka jongki kala pynlong ban iada ia ka jingim briew bad kala pynduna bha ia ka jingiap ki longkmie kiba pun khun” ula ong.
U Principal Secretary ula batai ruh ia ki paralok kiba iatreilang kum ka Bill & Melinda Gates Foundation bad ka Harvard University bad ka jylla Meghalaya ban kyntiew shuh shuh ia ka jingai jingsumar.
“Ka Gates Foundation kala pynbiang shuh shuh ia ki briew bad ia ki riewshemphang katba ka Harvard dang shen kala buh jingthoh ia ka jinglah ka jong ngi ban pynduna haduh 50% ia ka jingiap ki longkmie kiba punkhun, kaba la wanrah ia ka jinglong nongialam bad ka jingiashymbynta ki shnong ki thaw halor jong kane ka jingjop” ong u Kumar.
