Shillong, K’Lyngkot 08: U Myntri ka kam ialehkai ka Jylla Bah Shakliar Warjri ha ka sngi Balang, ula pyntip ba ka Sorkar Meghalaya ka la phah ia ka jingtyrwa sha ka Sorkar Pdeng ban ioh pynlong ia ka 39th National Games ha u snem 2027.
“Dang shen nga la ïakynduh ïa u Myntri ka tnat Youth Affairs and Sports ka Sorkar Pdeng ha ka 20 tarik u Nohprah 2024 ha Delhi ha kaba nga la aiti iaka jingtyrwa ban pynlong ïa ka 39th National Games hangne ha jylla Meghalaya” ong u Bah Shakliar haba iakren bad ki nongthoh khubor .
U Bah Shakliar u la pyntip ba u la pynlong ruh ia ka jingiakren bad ka tnat bad la pyntip ia u ba lada ailad ban pynlong ia ka National Games, ka Sorkar Jylla ka long kaba lah bha ban pynlong ïa kane ka lympung ialehkai.
Haba kylli halor ka jingpynkhreh, u Bah Shakliar u la ong “Hooid ngi la pynkhreh hynrei watla katta ruh ki don shibun ki jingpynkhreh kiba donkam ban leh. Kum ka Sorkar ngi trei shitom ban pynthikna ba ka National Games kaba ngin sa pynlong 2027 ha Meghalaya kan long kaba jop”.
U myntri u la pyntip ba ha kaba iadei bad ki jingtei, ka Jylla kala sakhi ïa bun ki jingtei ha kylleng ki district jong ka jylla. “Kumta nga sngewskhem ba lada ailad ngin sa lah ban pynlong ïa ka National Games” u la bynrap.
Ha kaba ïadei bad ka Meghalaya Games 2025 ka ban sa long shen, u Myntri u la ong ba ka jingplie kan long ha ka 20 tarik Kyllalyngkot bad baroh ki jingpynkhreh ki dang ïaid shakhmat.
“Baroh ki jait jingialehkai kin long hapoh ka West Jaintia Hills district lait noh tang 1-2 tylli ki jingialehkai ba kynthup ia ka Golf bad Swimming ki ban long ha Shillong” u la ong.
