Shillong Kyllalyngkot 08: U Symbud Myntri Rangbah ka jylla Bah Sniawbhalang Dhar hynne ka sngi Balang, ula pyntip ba ka Regional Committee jong ka West Jaintia Hills ka dang ap ia ka kaiphod na u Deputy Commissioner ha kaba iadei bad ki shnong ki thaw kiba hap hapoh jongka thain Block-I.
“Ngi lah ai por ia u DC ban pynkhreh ia kawei ka kaiphod kaba ngi kwah hapoh jong ka shi bnai ne ar bnai” la ong u Bah Sniawbhalang haba iakren bad ki nongthoh khubor.
“Ngin sa aiti ia ka kaiphod hakhmat jong ka sorkar bad ha baroh ar tylli ki sorkar jylla (Meghalaya bad Assam) bad ngin sa shim ia ka rai halor kane” ula ong.
U Bah Sniawbhalang ula ong ba ki don ki jingeh na ka bynta ban pynbeit ia ki 6 tylli ki jaka kiba don hapdeng ka jingiakajia pud ha ka wat ka baar jong ka jingiakren pynbeit pud bad ka Assam.
“Ka jingpyrshang kan iai bteng, namar ba kane ka mat kadei kaba la neh mynta la palat iaka 50-52 snem hynrei ha kine ki 5 snem kiba la leit, ngi lah pyrshang tyngeh ban pynbeit noh, kane kadei ka mat kaba kaba sorkar ka buh hakhmat bha. Ngi pyrshang ban pynbeit noh mardor kat kaba ngi lah” ula ong.
Ula ong ba na ka liang jongka jylla Assam kala ai ia ka jingiatreilang bad ka committee halor kane ka mat.
“Ngi don ia ka jingiatreilang hapdeng ka jong ngi (Meghalaya bad Assam) hynrei namar ba ka kam ka long kaba kyllain ha ki katto katne ki bynta hynrei ngi iatreilang hapdeng para ma ngi” ula ong.
