Shillong, K’lyngkot 08 : U Symbud Myntri Rangbah ka Tnad Transport Bah Sniawbhalang Dhar ha ka sngi Balang ula ong ba ka Inter-State Bus Terminal (ISBT) ha Mawlai Mawiong kan sa treikam pura biang hadien bala dep shna ia ka surok na Mawlai By-pass sha Shillong Airport hapoh une u snem.
“Ngi la iai ban ia ka Tnad PWD ba kan pyndep kham kloi noh ia kane ka surok. Kila don ha ka kam. Tang mar syn dep kane ka surok na Mawai Bypass, ka ISBT kan sa treikam biang kumba ka long” ong u Bah Dhar haba iakren bad ki nongthoh khubor.
Ula pyntip ba ka Tnad PWD ka lah ban pyndep ia ka jingtrei jong kane ka surok hashuwa ban kut jong une u snem ba mynta.
“Ngi la shong jingialang man ka por bad ki (PWD) bad ngi la kyrpad ia ki ba kin sngewbha ban pyndep kloi noh kat kaba lah ia kane ka surok” ula bynrap.
Halor ka jingkynnoh pyndonkam bakla ia ka ISBT da ki kynhun runar, u bah Sniawbha ula ong “Ki Ophisar jong nga ki ju leit man ka por sha ISBT haduh mynta bad kam pat don satia kano kano ka khubor ia ka jingdon ki kynhun runar ha ka thain”.
Nalor kane, u Symbud Myntri Rangbah ula ong ba ka Sorkar kam kwah satia ban shim ia ka lynti ba shipor na ka bynta ka jingtreikam ka ISBT hynrei ka kwah ban don beit noh da ka surok kaban treikam shirta.
