Shillong, K’Lyngkot 08: Ka Hill State People’s Democratic Party (HSPDP) hynne ka sngi kala pynbna sa ïa 3 ngut ki kyrtong ki ban iakhun haka elekshon MDC ban wan sha ka Iingdorbar Thaw Ain ka Khasi Hills Autonomous District Council (KHADC).
Kine ki kyrtong ki kynthup ia u Nongthoh Kot Khubor bah Starfing Jove Langpen Pdahkasiej u ban iakhun na Mawsynram, ka hynmen jong u Bah Shakliar Warjri Myntri Sorkar, ka Kong Phinda Warjri- na Pariong bad u Bah Srally Rashir- Mawshynrut constituency.
Ïa kine ki kyrteng jong ki kyrtong la pynbna da u President ka HSPDP u Bah KP Pangniang haka jingdonlang ki MLA bad ki nongkitkam ka Party.
Haba kren shaki lad pathai khubor u Bah KP Pangniang u la ong baka thong jong ka Party ha kane ka elekshon MDC ka dei hi ban iada iaka jinglong kyrpang ka synshar khaddar naduh ki Dorbar Shnong, ban pynneh pynsah iaka jinglong kyrpang ka rukom bat khyndew.
“Ka HSPDP naduh bala seng ha u snem 1968, lyngba ka KHADC ka ïeng haka nongrim ban iada iaka khyndew ka shyiap khamtam haki jaka ba hap haka jingiakajia pud bad ka Assam. Ngin bteng ban iakhun bad dawa naka Sorkar Jylla ban pyndep noh iaka jingïakren pynbeit pud bad ka Assam” la ong u Bah Pangniang.
U Bah KP Pangniang u la ïathuh ruh ba haki katto katne ki constituency ka Party ka khlem pynieng kyrtong shuh namar ka don ka jingiasngewthuh jingmut bad ka United Democratic Party (UDP) kiba iatreilang hapoh ka Regional Democratic Allaince (RDA).
