Shillong, Nohprah 10 : Ka Jylla Meghalaya kala kynjoh haduh 78.5% ha ka jingshna ia ki painkhana kat haduh mynta mynne.
“Haduh mynta, ka Jylla kala lah ban shna painkhana ha ki 53627 tylli ki Longiing bad 1108 ki painkhana ha ki Iingshnong bad jaka paidbah ha kylleng ka Jylla. Lada kren ia ka percentage, ngi la kynjoh 78.5% ha ka jingshna ia ki painkhana” ong u Myntri ka Tnad PHE Marcuise N Marak haba iakren bad ki lad pathai khubor ha ka sngi Ba-ar, kaba dei ka sngi pynkut ia ka “Hamara Shauchalay : Hamara Samman”.
U pyntip ba ia ka Hamara Shauchalay: Hamara Samman la sdang pyntreikam naduh ka 19 tarik Naiwieng, 2024 da ka thong ban ialap ia ka jingdonkam ki painkhana kiba treikam ha baroh ki Iingbriew bad ki Shnong ki thaw.
“Ka campaign ka kut mynta ka sngi (10 tarik Nohprah 2024), ka sngi ba rakhe ha kylleng ka pyrthei kum ka Human Rights Day namar baroh ki briew ki dei kiba la kha laitluid bad mar kumjuh ha ka longryngieng bad ka hok, kata ka dei ka mat ba hakhmat eh.
Ha kajuh ka por,u Myntri u pyntip ba ka Tnad kala ioh pdiang ia palat 14.80 lak ki aplikeshon ban shna ia ki painkhana ha ki thliew iing jong ki riew shimet.
“Na kane, ngi la dep pyllait ia ka pisa ban shna haduh 87,184 ki painkhana ha ki shnong bapher bapher ha ka jinglut kaba kot T.12,000 kawei” ula ong.
U Marak ula shong bishar kam ruh halor ka jingpyntreikam ia ka mission hapoh ka Jylla bad ong “Nga la kren shai ba ka Tnad ka dei ban pynthikna ba baroh ki painkhana la ka dei jong ki shimet ne ki shnong ki thaw, ki dei ban long kiba treikam”.
Kat kum ka jingong jong u, ka Jylla kala kynjoh ia ka 83.81% haba iadei bad ka Open Defecation Free (ODF) plus status.
Haba kylli, u Myntri ula ong ba ka jingioh jaka ka dei kawei na ki jingeh kaba mad da ka Tnad haba pyntreikam ia ka mission.
“Namar kata, nga la kyrpad ia ki Rangbah Shnong, Nokma, Daloi ba kin iatreilang bad ka Sorkar ha ka jingshna ia kine ki jingtei khnang ba ngin lah kynjoh ia ka 100 % ha ka jingshna painkhana hapoh ka Jylla” ula bynrap.
