Shillong, Risaw 28 : Ka Kynhun Myntri ka Sorkar Jylla ha ka sngi Ba-ar kala ai jingmynjur ban thied biang sa ka jaka rep kba kaba don markhap ka Knowlegde City ha Mawkanu, New Shillong ha ka dor ba T.13.78 klur.
U Nongaiktien ka MDA bad Myntri Sorkar Bah Wailadmiki Shylla ula ong ba kane ka jaka rep ka dei kaba don hapdeng ka jaka kaba heh bala dep thied lypa da ka Sorkar Jylla.
“Kumba phi iatip, ngi la thied ia ka jaka kaba heh ha ka thain Mawkhanu, hynrei ka don khyndew ka jaka rep kba kaba don hapdeng. Ia kane ka kam lah iakren ruh ha ki por bala leit” ong u Bah Wailad.
U ong ba kane ka jaka rep kan pynthut ia ka jingpyndonkam hok ia ka jaka jong ka Knowledge City.
“Namar kan wan hapdeng, kan sa ktah ia ka jingpyndonkam ia ka jaka, kumta ka Kynhun Myntri kala rai ban thied noh ia kane ka jaka” ula bynrap.
U Bah Wailad ula iathuh ba ka jaka baroh lang ka long haduh 2,81,000 sqft bad ka dor ka long T.490 shi sqft kumba thied nyngkong.
Ka pisa baroh lang ka kot haduh T.13.78 klur.
