Shillong, Risaw 28 : Ka Kynhun Myntri ka Sorkar Jylla ha ka sngi Ba-ar kala rai ban pynjlan ia ka jingshakri jong u Bah BM Syiem kum u Executive Director (Technical) ka MIDFC sa arsnem watla ula dei ban shongthait mynta u bnai.
Ia kane ka rai la shim ha ka jingialang ka Kynhun Myntri kaba pyniaid da u Myntri Rangbah Conrad K Sangma.
U Nongaiktien ka MDA bad Myntri Sorkar Bah Wailadmiki Shylla u iathuh ba ka jingpynjlan ia ka jingshakri u bah Syiem ka long kaba donkam namar ki dang don ki project kiba sahteng.
“Kumba phi tip, un sa shongthait noh mynta u bnai, hynrei ngi la pyndonkam ia u ha kiba bun ki kam kum u Executive Director (Technical) ka MIDFC bad ki dang don bun ki project kiba dang sahteng” ong u Bah Waulad.
Kumjuh ruh, u Bah Wailad u pyntip ba ka Kynhun Myntri kala mynjur ia ka panel ban thung ia u President ka Meghalaya State Consumer Disputes Redressal Commission.
“Hapoh ka jingai jingmut jong ka Committee, kila phah ia ka kyrteng u Justice W Diengdoh kum u President ka Meghalaya State Consumer Dispute Redressal Commission,” ong u Bah Wailad.
