Shillong, Risaw 27 : I Kong R Lyngdoh, Ophisar IAS bala shongthait, in sa shimti kum ka Chief Information Commissioner (CIC) ka Meghalaya.
Ia kane ka jingthungkam la mynjur da ka jingialang jong ka Kynhun Myntri bala pyniaid da u Myntri Rangbah Conrad K Sangma ha ka sngi Ba-ar.
Haba pyntip ia kane, u nongaiktien ka MDA bad Myntri Sorkar Bah Wailadmiki Shylla ula ong ia ka kyrteng la ai jingmut da ka Selection Committee ba khlieh da u Myntri Rangbah.
“Ka Selection Committee ka kynthup ia u Myntri Rangbah, Symbud Myntri Rangbah ba khmih ia ka kam pohiing bad u Nongialam ka Liang Pyrshah. Kila ai jingmut ia ka kyrteng I kong R Lyngdoh, Ophisar IAS bala shongthait” ong u Bah Wailad.
U Bah Wailad ula iathuh ba I kong R Lyngdoh ila dei teng I dkhot jong ka State Information Commission bad kumta ka Kynhun Myntri ka sngewdei ban jied ia I kum ka Chief Information Commissioner.
