Nongpoh, Nohprah 10 : U Symbud Myntri Rangbah ka Jylla Bah Prestone Tynsong, ha ka sngi Ba-ar, ula buh mawnongrim ban pyntrei noh ia ka surok Nongpoh-Umden-Sonapur, kaba pyniasoh ia ki spah tylli ki shnong hapoh ka thain.
Kane ka surok ka dei kaba la shu ieh jot rathai da ki phew snem khlem ka jingmaramot-kaba la wanrah ia ka jingkordit bad jingsohsat ia ki paid nongshongshnong ka thain, kiba shaniah tylli ha kane ka surok ha ka kit ka bah, ka iaid ka ieng bad khamtam eh ha ka pang ka shitom.
Ka Sorkar Jylla kala mang ba ia ka surok na Nongpoh sha Umden kaba jngai kumba 20 Km, na ka skhim State Plan kaba kot haduh T.49.53 klur katba ia ka surok na Umden sha Sonapur kaba dei ka Intermediate Lane bad kaba jngai kumba 38.6 Km, la mang lyngba ka skhim PMGSY-III Batch-I ha ka jinglut ba T.47.20 klur.
Haba ai jingkren ha ka jingialang buh mawnongrim, u Bah Prestone ula ai khublei ia u MLA, MDC, ki Heh Ophisar ka Tnad PWD bad ruh ki paidbah kiba la a ka jingiatreilang bad ka Sorkar ban pynurlong ia kane ka sngi, ka ban sah jingkynmaw ha ka thain.
U DyCM u pyntip ba hapoh une u bnai Nohprah, ka Tnad PWD kan sa pyndep lut ia baroh ki jingdonkam khnang ban lah pynsdang noh ia ka jingpyntrei ia ka surok naduh u bnai ba nyngkong jong u snem 2025.
Kat kum ka jingong jong u, ka Sorkar Jylla kala pynlut da ki phew hajar klur ha ka shisnem ban shna ia ki surok bad ki jing kieng ha kylleng ki jaka ka Jylla haba pyntip ba ha une u snem mang tyngka 2024-25, ka Sorkar kala pyntrei ia bun ki project na ka skhim PMGSY kaba la jan kot sha ka 800 Km.
U Bah Prestone u pyntip ruh ba tang ban shna pynbha ia ki surok ha Jylla baroh kawei, ka Sorkar lyngba ka State Plan kala mang haduh T.1100 klur, na ka PMGSY kala mang T.1100 klur, ka CIRF kumba T.400 klur, RIDF-140 klur bad na ka World Bank kumba T.2000 klur haba pynpaw ia ka jingkyrmen ba ha kine ki ar-lai snem ban wan, ki paidbah kin sa iohi ia ki jingkylla hadien bala dep ban pyntrei ia barh kine ki surok.
U MLA ka thain Bah Mayralborn Syiem ula ai ka jingiaroh ia u DyCM halor ka jingshimkhia ban buddien ia ka kam bad ban pyndep ia ki jingkular kiba ula khlei ha u snem bala leit noh.
Une u MLA ula panmap ruh na u DyCM ioh lehse ki don napdeng ki paidbah ka thain kiba la kren bein,kren khoh bad pynmong ia u ha kine ki bnai bad snem bala leit noh na ka daw jong kane ka surok haba kyrpad ia u DyCM ba un nym bat ne thew ia kine ki jingleh u paidbah ka thain.
Kiba la iadonlang ha kane ka sngi ki kynthup ruh ia u MLA ka Umsning Dr Celestine Lyngdoh, MDC ka Nongpoh Bah Balajied Rani, ki Heh Ophisar ka Tnad PWD (Roads) bad Building, ki bor pyniaid District bad kiwei kiwei.
