Shillong, Risaw 28 : Ka Kynhun Myntri ka Sorkar Jylla ha ka sngi Ba-ar kala ai jingmynjur ia ka jing pynthymmai ia ka jinglut jingsep naka bynta ki khyndai tylli ki project surok hapoh ka Meghalaya Integrated Transport Project (MITP) ba kyrshan ka World Bank, kaba la iohi ia ka jingkiew ka jinglut jingsep ba kot palat 25%.
Haba kren sha ki lad pathai khubor hadien ka jingialang, u Myntri Sorkar Bah Wailadmiki Shylla ula iathuh ba kat kum ka rai ba hashuwa jong ka kynhun Myntri, kano kano ka project kaba kiew ka jinglut jingsep ia palat 25% ka donkam ia ka jingmynjur ka Kynhun Myntri.
“Ki don haduh khyndai tylli ki project kiba la tam ia ka jingkiew ka jinglut jingsep ba 25%. Kumba phi ia tip, ka Kynhun Myntri kala dep shim rai ba baroh ki jingmang thymmai ba tam ia ka 25% kan iaid lyngba ka Kynhun Myntri ban ai jingmynjur. Kumta mynta, ki don khyndai tylli ki project surok bad ngi la ai jingmynjur ia ki” ula ong.
Haba batai ia ki daw ka jingkiew ka jinglut, ula ong “Kiba bun na ki jingkiew ka jingpynlut ja dei namar ka jingnang kiew dor ki mar ki mata bad ki kam ba shna bynrap bad ruh namar ka jingkylla ha ka GST. Ha ka por ba ngi mang ia kine ki surok, ka GST ka long 12% hynrei mynta kala kiew sha ka 18%. Namar kine kiei kiei, kala kiew ka jinglut jingsep ha kine ki khyndai tylli ki surok”.
