Shillong, Risaw 31: Ka Sorkar Jylla hynne ka sngi Palei, kala pynkup burom ia u Bah Francis A. Khongwar, u nongthoh khubor uba la rim ka jylla uba la noh synniang bha ha ka kam pathai khubor.
U Chief Secretary ka jylla u Bah D.P. Wahlang, ula aiti ia ka cheque kaba T. 1 lak ia u Bah Khongwar kum ka dak jong ka jingsngewnguh ia ka jingtrei shitom ka jong u.
Kum ban shu kdew, ka sorkar jylla lyngba ka Directorate of Information and Public Relations, Shillong, dang shen kala pynkup burom ia ki 8 ngut ki nongthoh khubor kiba la trei slem bha ha ka kam, ha ka Meghalaya Media Meet 2024 kaba la long ha Hotel Vivanta, Shillong.
Ha katei ka jingialang u Myntri Rangbah ka jylla u Conrad K. Sangma ula pynbna ia ka Special Grant kaba mar T.1 lak ia kitei ki nongthoh khubor kum ka jingithuh ia ka jingtreikam ka jongki ha kaban pynwandur ban pynsaphriang ia ki jingtip sha ki paidbah ka Meghalaya.
U Bah Francis A. Khongwar ula sdang ia ka kam thoh khubor naduh u snem 1984 kum u Reporter jong ka kot khubor Khasi “Dongmusa” bad hadien kane ula leit ban trei noh ha ka Press Trust of India, Shillong, kum u Transmission Operator.
Ha ka jingiaid ki snem, ula noh synniang shi katdei sha ki kynhun pathai khubor kiba kynthup ia u Apphira, Nation Builder, Mawphor, Kynjat Shai bad kiwei kiwei.
Wat mynta, u Bah Khongwar ula bteng ha kaban shakri ha ka kam pathai khubor ha kaban pyni ia ka jingkitkhlieh ia ka jingshisha bad ka jingkhuid jingsuba.
