Shillong, Risaw 29: Ka Jaiñtia National Council (JNC) kala pynpaw ia ka jingsngewkhia halor ka jingdon duna palat ki nonghikai ha ka District Institute of Education and Training (DIET) Thadlaskein ryngkat bad ka jingdonkam kyrkieh ia ka Meghalaya Teacher Eligibility Test (MTET) exams bad ban pyllait mardor ia ka scholarship.
Ka JNC hapoh ka jingialam u General Secretary u Wanshwa Suting, kala leit iakynduh ia ka Director jongka Directorate of Educational Research and Training (DERT) ha Meghalaya, ka R.S. Manners hynne ka sngi Baar ban iakren halor katei ka mat.
Ka JNC kala pynpaw ia ka jingsngewkhia halor ka jingdon duna jong ki nonghikai ha ka DIET Thadlaskein, West Jaintia Hills District. Kaba don mynta tang 14 ngut ki nonghikai hadien ba 2 ngut kila shah pynkynriah kam noh.
U Bah Wanshwa Suting, ula ong ba ia kitei ki kam kiba laity m shim la pynrung kam, kaba la pynlong ia ki nonghikai ban shim ruh sa ia kiwei pat ki sobjek bad ka jingkit ka jongki kala nang khia shuh shuh ban khmih ia ki prokram bad ia ki training kiba man la ka sngi.
Ka seng kala banjur ba ka jingdon duna ki nonghikai kan buh pat ha ka jingma ia ka jingioh jinghikai bad ia ka jingnang jingstad ia ki nonghikai kiba ioh jinghikai bad kane kan long kumba iapein ia ka jingoynkhreh ka jongki ha ka kam kaba kin trei nangne shakhmat.
Ula pynpaw ruh ia ka jingdonkam ban maramot noh mardor ia ka jaka pule bad khamtam ia ki jaka leit bar ki bym long shuh kiba bit ba biang bad kaba lah ban khyllem lada jia ba ka don ka jingthud jong ka suinbneng. Kine ki jingjia ki long ki bym shngain bad ka sawdongsawkun kam long satia kaba khuid ba suba ia ki samla pule bad ia ki nonghikai.
Nalor kane, ka JNC kala pynpaw ruh ia ka jingdonkam ban pynlong iaka eksam MTET man la ka snem. Kumba long mynta la pynlong ia ka eksam shisien ha ka 2 snem bad kane ka jingjngai palat kan pynslem ia kito kiba kwah long nonghikai kiba la pyndep ia ki Diploma ha ka Elementary Education (D.El.Ed) ne Bachelor in Education (B.Ed) bad kiba ap ban ioh ia ka certificate. Ka jingpynslem kan lam sha ka jingeh ia ki samla ba ki lah ban heh noh ka rta ka jongki bad kin ym lah shuh ban iakhun ia ki kam nonghikai kiba lait. Ka JNC kala pynpaw ba ka jingpyniaid lang ia ka MTET bad ka jingleh ka sorkar pdeng ha kaban pynlong iaka Central Teacher Eligibility Test (CTET) 2 sien ha ka shisnem kan pyniar ia ka la jong ki candidate bad bkan pynduna ia ka por ban ap.
Khatduh eh ka JNC kala kyrpad iaka tnad ban pynkloi ha kaban pyllait ia ka Scholarship naka bynta ki samla kiba pule ha ka DIET bad kane ka long kaba donkam bha ha kaban kyrshan ia ki samla pule ha ka roi ka par bad ban ioh iaka jingpule kaba paka ha Meghalaya.
Halor kine ki jingpynsngew jong ka JNC, ka Director R.S. Manners ula pynthikna ba ka tnad ka dang trei shitom bha ban weng ia kitei ki jingeh jong ka jingduna nonghikai ha DIET Thadlaskein bad ka jingthmu ban pynbna paidbah ia kitei ki kam kiba lait.
Ha kaba iadei bad ka eksam MTET, kala pynpaw ba ki jingpynkhreh kila iaid shakhmat ban pynlong noh man la ka snem naduh u 2025. Ka Kong Manners kala pynthikna ruh ba ka bhah tyngka jongka scholarship la dep ban bhah iaka pisa bad yn sa pyllait noh shen da ka sorkar Meghalaya.
