Shillong, Risaw 29 : U Nongialam ka United Democratic Party (UDP) bad Myntri Sorkar Bah Paul Lyngdoh ha ka sngi Ba-ar ula ong ba ka party jong u, kala pynjngai ialade na ka elekshon shiteng samoi ka Gambegre ban long la 13 tarik Naiwieng namar ka jingdon jong ka (party) ha Ri-lum Garo ka dang duna bha.
“Ngi la pynjngai ialade na ka elekshon shiteng samoi kaba mut ba ngim don eiei ban leh bad kane ka elekshon shiteng samoi” ong u Bah Paul haba jubab ia ka jingkylli la ka UDP kan ai ka jingkyrshan ia ka liang synshar National People’s Party (NPP) ha ka elekshon.
“Ka jingdon jong ngi ha Ri-lum Garo ka dang duna bha. Kumta, kam don jingmut ia ngi ban don bynta ha kane ka elekshon shiteng samoi” ula bynrap.
