Guwahati, Nailar 20 :Ki bor pulit ka Goalpara hynnin ka sngi Saitjain kila kem noh ia laingut ki briew kynthup ia u nongialam niam (Imam) jong ka mosque halor ka jingsuba donkti bad ka kynhun seng lehnoh na Bangladesh, ka Ansarullah Bangla Team (ABT).
Lah ban kdew ba ka kynhun seng lehnoh ABT kaba dei ka bynta ka tnat treikam jong ka Al-Qaeda.Ia kine ki briew kiba la shah kem la tip kyrteng kum u Abdus Subahan na Dakaidal bad u Jalal Uddin u ba dei na ki bynta jong ka Matia.
Na ka liang ki pulit kila kem noh ruh wat ia uba shipara arkmie jong u Subahan lem bad u hymmen jong u na ka bynta ban pynlong ka jingtohkit.
Ha kawei pat ka bynta, uwei u briew uba dei na ki bynta jong ka Matia kaba ha Goalpara ula shah kem noh hynnin ka step sngi Saitjain ha ki pulit halor ka jingsuba donkti bad ki kynhun seng lehnoh.Ia une u briew la tip kyrteng kum u Jalal Uddin.
La ioh jingtip ba u Abdus Subahan u dei u ‘Imam’ jong ka Tinkoniapara Mosque bad ruh u nonghikai hapoh ka skul Madrassa haTinkoniapara.Ki pulit kila kem noh ia u Jalal Uddin hynnin ka step sngi Saitjain, katba ia u Abdus Sobahan la kem noh hadien ka jingduwai hapoh ka mosque ha kane ka miet sngi Thohdieng ba la lah. Baroh kine ki arngut mynta kila don hapdeng ka jingshah tohkit ha ki bot pulit ka Goalpara.
Ha kawei pat ka bynta, na ka liang kiba haiing hasem jong u Abdus Subahan kila dawa ban pynshitom tyngeh ia u lada lap shisha ba u donkti, hynrei lada kim lap ki dei ban pyllait noh ia u mardor.
Dang ha kine ki san bnai ba la dep, santylli ki dkhot jong ka kynhun seng lehnoh Ansarullah Bangla Team (ABT), kila shah kem noh ha ki bor pulit ka jylla da ka jingiarap lem ki tnat syntiat, ong u Myntri Myntri Rangbah (CM) ka Assam, u Himanta Biswa Sarma.
“Haduh mynta kila don haduh 29 ngut ki dkhot nongialam ka kynhun ABT lane ki dkhot kiba la shah kem noh,” ong u Sarma ha ka jingialang bad ki lad pathai khubor ha Janata Bhawan.
Nalor kata ula ong ruh ba ki pulit kila lapdien ruh ia ki jingtreikam ba buhrieh jong kane ka kynhun ha Barpeta, Bongaigaon, bad Morigaon bad ioh kurup ruh ia ki kot pule jihadi kiba la pyndonkam bakla ia ki samla ba kin pyniasoh bad kane ka seng.
