Shillong, Nailur 20 : Ki paid nongshongshnong ka Jongksha, East Khasi Hills, hynne ka sngi Thohdieng, kila khang tala noh ia ka Jongksha Community Helath Centre (CHC) namar ka jingbym don doktor ban ai jingshakri ha kane ka jaka sumar jong ka Sorkar.
La pyntip ruh ba ki paid nongpang kiba leit thiah pang ha kane ka jaka sumar, kila hap ban mih noh bad leit wad ia ki jing sumar sha kiwei pat ki jaka khamtam sha Nongbah Shillong.
Lah ban kdew hangne, ka Jongksha CHC ka dei kaba dang shu dep kyntiew kyrdan na ka Primary Health Centre ha u bnai Nailur 2022 bad la plie mawnongrim ia ka, da u Myntri Sorkar barim Bah Banteidor Lyngdoh uba dei ruh u MLA ka thain.
Haba iakren bad iwei I Longkmie iba ialam ka Village Organisation bala ai kyrteng ka Shlem Jingkyrmen, Jongksha, ila pyntip ba ka jingkhang tala ia kane ka CHC ka dei kaba la leh halor ka nongrim ka jingbym don doktor ban ai jingsumar ia ki paid nongpang.
Kat kum ka jingiathuh jong I, kane ka CHC ka don angut ki doktor MBBS kiba ai jingshakri hynrei kine ki doktor kila shim shuti naduh ka 14 tarik mynta u bnai-ka ban treikam haduh 45 sngi.
I pyntip ba ki nongpyniaid ka hospital kila pynmih lut ia baroh ki nongpang ba thiah sumar ha kane ka jaka sumar naduh ka 14 tarik halor ka nongrim ba ym don doktor ban sumar ia ki.
Ine i Longkmie i iathuh ba ki Nongialam Shnong hapoh ka jingialam u Rangbah Shnong, kila leit ban jurip hynne ka sngi Thohdieng ia kane ka CHC bad shem ba ym don doktor satia. Kila kylli bniah ia kane ka kam bad shem ba ki doktor kila shim shuti haduh 45 sngi.
I ong ba kane ka jingshim shuti ki doktor ka long kaba lah leh khlem da pyrkhat ia u paidbah namar ym shym la don satia ki doktor ki ban wan bujli ha ka jaka jong ki ban ai jingsumar ia ki nongpang kiba thiah pang hapoh ka CHC.
Ka Shnong kala leit ruh ban pyntip sha u Sordar halor kane ka jingjia hapoh ka CHC ha kaba u Sordar ula shimti ban iakren bad ki bor ba halor jong ka Tnad ka Koit ka Khiah.
Hynrei la kynnoh ba namar ka jingbym don ka jingshimkhia ia ka kam na ki bor ba dei khmih, ki paidbah kila rai hynnin ka miet ban khang tala noh ia kane ka CHC tad haduh ba kin da ioh ia ki doktor bad hynne ka step kila pyntreikam ia kane ka rai.
